O adestrador alfocego Juanma Marrube despediuse este mércores do Pescados Rubén Burela FS despois de que a directiva decidise relevalo no cargo.
O ata o de agora técnico do primeiro equipo masculino expuxo nunha rolda de prensa ter o sentimento do “deber cumprido” pechando unha etapa que “forma parte do camiño despois de 1.200 días” á fronte do cadro laranxa.
Despois de tres tempadas e media dirixindo o conxunto mariñao, ao que levou de novo á Primeira División, na súa despedida o ‘Mariskal‘, que como futbolista foi probablemente o xogador máis importante do club, mostrou o seu agradecemento.
DISCURSO DO ADESTRADOR
“Grazas ao club e directiva pola oportunidade. Grazas á familia do Pescados Rubén.
Grazas á afección, noteinos sempre preto e identificados co que transmitía o seu equipo.
Grazas aos xogadores destes catro anos. Todos, as catro tempadas. Todos axudaron a transformar isto.
Grazas aos empregados do club. Son un valor engadido, un activo importante.
E como non? Grazas ao corpo técnico: Mera, Tulio, Míchel, Cristina, Miguel, Javi Couce, Casiano, Antonio, Anselmo, Guillén… un gran labor desinteresado.
A Cristian, Mario… Á Base pola súa grande importancia, reflexo do primeiro equipo. Todos me fixestes a vida máis doada.
🎙️ 𝗥𝘂𝗲𝗱𝗮 𝗱𝗲 𝗽𝗿𝗲𝗻𝘀𝗮 | El Mariskal se despide del @burelafs dando las gracias a todos los estamentos de la entidad 𝟭.𝟮𝟬𝟬 días después de tomar el mando de la nave.
🗣️ @juanmamarrube: “Ha sido un reto bonito, me voy con el deber cumplido”.
Gracias🧡 pic.twitter.com/jAn88FY2vX
— Pescados Rubén Burela FS (@burelafs) February 24, 2021
Grazas por todas as mostras de apoio que estou a recibir, de adestradores, ex xogadores…
Como lles digo sempre aos xogadores, forma parte do camiño e da cómoda vida do adestrador.
Voume coa satisfacción de transformar un equipo, uns xogadores en algo máis que iso, de ter unha visión para o club e conseguila; coa satisfacción e a tranquilidade do deber cumprido.
O máis importante é o que deixas e iso significa deixalo en mellor lugar do que o atopaches. Foi un reto bonito.
Sempre estiven moi orgulloso de relacionar palabras con comportamentos, moi orgulloso de poñer rumbo e dirección, moi orgulloso de crear, manter e cumprir obxectivos. Os feitos para min son realidades.
Foron 1.200 días da miña vida de autenticidade, claridade, disciplina e coherencia. Sempre tratei de facer e facer máis, iso é o meu éxito.
A loita diaria reflicte a cultura que deixamos. Amo o que fago.
A viaxe continúa. Cando tes un porqué sopórtase calquera como. Agora toca a familia.
Grazas a Mariajo, Gabriel e Jimena. Agora toca devolvervos uns poucos deses días. Sodes o verdadeiro motor. Seguimos.”
