O Pescados Rubén Burela asinou este martes coas futbolistas do primeiro equipo e con representantes da Asociación de Jugadoras de Fútbol Sala (AJFSF) o único convenio colectivo do deporte feminino en España.
Trátase dun paso adiante cara igualdade e o profesionalismo das mulleres no fútbol sala. As futbolistas do primeiro equipo laranxa tiveron contrato ao longo das pasadas tempadas, pero o acordo supón a blindaxe dos dereitos das xogadoras.
DEREITOS
Entre eles está a renovación automática en caso de embarazo, o compromiso de vacacións en datas sinaladas ou a disposición de dez días de asuntos propios para o coidado de fillos ou maiores.
O salario mínimo de 900 euros -cunha suba anual do 2%-, as axudas para a conciliación familiar -garderías, subvención para os libros de texto- ou son outros puntos destacados do convenio, que terá unha duración de dous anos.
O ACORDO, VÁLIDO POR DOUS ANOS, ESTABLECE UN SALARIO MÍNIMO DE 900 EUROS E UNHA COMPENSACIÓN DE ATA 100.000 POR INVALIDEZ
Ademais, o club compartirá os dereitos de imaxe coas xogadoras e incluíu un seguros de accidentes, con cantidades a percibir por falecemento de 70.000 euros, 100.000 por invalidez e 40.000 por inhabilitación para a práctica do deporte.
“UN PASO MÁIS”
O presidente da entidade laranxa, Manuel Blanco; as capitás, Bea Mateos e Joziane de Oliveira, e a presidenta da AJFSF, Natalia Orive, selaron o acordo na notaría de Burela.
O acordo, negociado ao longo dos último meses e vixente desde o pasado 1 de outubro, foi asinado ante o notario Ignacio Catania, que non aplicou ningún tipo de arancel polos seus servizos.
O presidente do Pescados Rubén Burela, Manuel Blanco, explicou que o convenio “é un paso máis na nosa aposta polo deporte feminino, a mostra definitiva e un feito lóxico, plasmar por escrito unha realidade”.
Orive, pola súa parte, sinalou que a sinatura do pacto foi “un momento histórico para o deporte feminino. Ogallá tivesemos 15 anos para vivir este momento da profesionalización do fútbol sala”, espuxo.
“este convenio racha coas inercias e co establecido. demostra que se pode se hai vontade”, di a asociación de futbolistas
Preguntada pola posibilidade de que outros clubs cheguen a acordos semellantes, Orive sinalou que “este convenio racha coa inercia e co establecido. Copiamos parte do convenio masculino, pero tamén introducimos cousas novidosas e distintas como mulleres que somos. O Burela FSF demostrou que se pode facer se hai vontade”, indicou.
AS XOGADORAS: “SENTÍMONOS VALORADAS”
Pola súa banda, Bea Mateos agradeceu ao club e ao patrocinador Pescados Rubén “o grande esforzo realizado”.
A outra capitá do cadro burelés, a brasileira Jozi, lembrou que noutros países “non temos modelos como a AJFSF, que traballa moitísimo, nin como a entidade, que nos fai sentir valoradas e facer da nosa paixón a nosa profesión e o noso día a día”.
Por último, o vicepresidente do Burela FS, José Luis Sáez, asegurou que a loita pola igualdade “demóstrase con feitos e non con palabras, cun desembolso económico importante do noso patrocinador”, e falou sobre a negociación.
A PÓLIZA DE SEGUROS, “O MÁIS COMPLICADO”
“Chegar a un acordo foi doado pola boa vontade de todos. O máis complicado foi acadar a póliza de seguros. Non foi fácil atopar unha compañía que nos permitise ofrecer unha indemnización ás xogadoras no caso de que non poideran seguir no deporte co que gañan a vida”, precisou.
ÚNICO NO DEPORTE FEMININO ESPAÑOL
O convenio colectivo asinado polo Pescados Rubén Burela FS non é o primeiro do deporte feminino español, pero si é ata agora o único vixente.
O CONVENIO APROBADO NO 2008 POLO BALONCESTO NON DUROU E OS CLUBS DE FÚTBOL NEGOCIAN COS SINDICATOS
En xaneiro do 2008, o baloncesto español converteuse en pioneiro coa aprobación dun acordo que non durou e que na actualidade carece de validez.
A Asociación de Clubs de Fútbol Femenino, que xunta a 14 dos 16 equipos da Primeira División -agás Athlétic Club de Bilbao e FC Barcelona– e os sindicatos negocian a aprobación dun convenio.
