A plataforma sindical das empresas auxiliares de Alcoa San Cibrao anunciou o seu “total apoio” á manifestación convocada polo comité do complexo industrial cervense para o vindeiro dia 26 de febreiro en Lugo.
Deste xeito, o colectivo fai un chamamento a todas as empresas auxiliares de Alcoa San Cibrao a secundar a manifestación.
O colectivo sostén que “estamos na recta final do proceso de alegacións ao estatuto das empresas electrointensivas, e debemos mandar unha mensaxe forte e clara ao Goberno do Estado para que atenda as reclamacións feitas dende os diferentes sindicatos. A unión daranos a forza”, conclúen.
REUNIÓN
Os sindicatos das auxiliares agradecen ao comité de Alcoa que os animase a respaldar a protesta e tamén o convite realizado “pola Vicepresidencia da Deputación de Lugo” para “participar na reunión conxuntamente” que se manterá co organismo de representación dos traballadores do complexo industrial sancibrense, valorando que se “recoñeza así” aos obreiros das empresas que traballan para as plantas de alúmina e aluminio, que reivindican que San Cibrao ten “2.000 empregos directos”.
