O presidente do comité de empresa de Alcoa San Cibrao, José Antonio Zan (CC OO), asegurou trala reunión mantida co presidente do Partido Popular (PP), Pablo Casado, que “ao Goberno só lle queda lexislar“.
O sindicalista insistiu en urxir ao Executivo central a que aprobe as alegacións presentadas ao borrador do estatuto das empresas electrointensivas tanto polas centrais sindicais como polas Autonomías de Galicia, Asturias e Cantabria.
Tras anunciar Casado en San Cibrao que o PP respaldará a aprobación do estatuto das electrointensivas de presentarse “en marzo” e de “incluír” as alegacións presentadas ao documento, Zan expuxo que “se o principal partido da oposición vai apoiar calquera marco enerxético que nos sitúe entre os 35 e os 40 euros o megavatio/hora (Mwh), que aínda estaría por riba de Europa pero que nos faría competitivos, o Goberno o que ten que facer é aceptar as reclamacións para dar un futuro ao sector electrointensivo”.
O presidente do comité de empresa do complexo industrial de San Cibrao sostivo que “só pedimos ao Executivo que faga o que fan no resto dos países. Sen un marco enerxético estable e competitivo, haberá cementeiras ou cerámicas, pero non empresas electrointensivas“.
OS LAZOS AZUIS CHEGARÁN ESTE VENRES A BURELA
Os traballadores continuarán este venres en Burela, tras pasar por Xove, San Cibrao e Viveiro, a campaña de lazos de cor azul eléctrico coa que aspiran a concienciar sobre a situación da planta de aluminio, ameazada de peche por Alcoa sen un abaratamento da electricidade.
