Mentres se suceden as conversacións entre os sindicatos e a dirección de Sargadelos, coa mediación da Xunta de Galicia, este martes foi o segundo día consecutivo sen despedimentos na fábrica de cerámica de Cervo. Polo de agora, a empresa executou 19 dos 49 cesamentos anunciados o venres 17 de agosto, cando o conselleiro delegado, Segismundo García, esixiu a fin da “presión sindical” e ameazou con pechar a factoría.
A representante da Unión Xeral de Traballadores (UXT), Rogelia Mariña, segue sinalada pola dirección da fábrica, que este luns impediu que se incorporase ao seu posto ao prorrogar de forma unilateral o seu permiso retribuído durante outros seis días.
A ausencia da sindicalista podería prorrogarse ao ter solicitadas as súas vacacións para o mes de setembro, mentres que a asemblea de traballadores que decidirá sobre o seu cargo está prevista para o día 11 do vindeiro mes.
O coordinador do servizo xurídico do sindicato, Pedro Blanco, sinala que “seguimos sen saber cal é a finalidade desta ameaza contra nada” do conselleiro delegado de Sargadelos, xa que, lembra, “non houbo ningunha demanda por parte da UXT ata que este señor abriu o 17 de agosto a caixa de pandora”.
O avogado lembra “a presión” que está a padecer a representante sindical e asegura que a sentenza que obrigou a readmitir a Mariña “non é firme”, polo que a delegada volveu á factoría “de forma provisional” e “non cobrou un céntimo” dos 30.000 euros estipulados como compensación polos “danos morais” ocasionados.
A UXT mantén a solicitude da tutela xudicial “para protexer á nosa afiliada e aos traballadores”, sinala Blanco, e demandas contra a dirección da empresa e contra o conselleiro delegado. Sargadelos terá agora un prazo de cinco días para facer alegacións. O sindicato espera ter novas dos xulgados a semana que vén.
Eladio Quelle, secretario de UXT-FICA (Federación de Industria, Construción e Agro) na Mariña Lucense, nega calquera tipo de xuntanza entre o sindicato e a dirección, mentres que este medio tentou consultar, sen éxito, ao responsable comarcal de Comisións Obreiras (CC OO).
OBREIROS DE ALCOA
A representación da UXT en Alcoa emitiu un comunicado no que defendeu o esforzo de Rogelia Mariña “ao longo de 40 anos na empresa” e destacou a a capacidade negociadora da sindicalista, ao seu xuízo demostrada durante décadas. “Se se chegaron a acordos nas negociacións é porque empresa e sindicatos estiveron sempre de acordo, e porque a UXT soubo ser flexible en épocas nas que Sargadelos non pasaba pola súa mellor época comercial, para manter as condicións dos obreiros e garantir a viabilidade da fábrica”, apuntan os operarios da planta sancibrense.
Os sindicalistas mostraron o seu “total desprezo” a quenes “machacan” á sindicalista e “compracen ao seu amo”, en alusión a García, que “dirixe esta fábrica con métodos máis propios dos séculos XVIII e XIX”.
BNG
O BNG emitiu un comunicado no que asegura que tralas críticas do partido á dirección da empresa, o conselleiro delegado, Segismundo García, realizou unha “insólita chamada telefónica” ao responsable local, Diego Fernández, na cal lle ofreceu venderlle a empresa “polo mesmo prezo que lle custou”.
