O comité de empresa de Alcoa anunciou que mañá venres manterá unha xuntanza para acordar “as medidas a tomar, tales como un calendario de mobilizacións e a intensidade das mesmas”, ante a proposta da multinacional dun despedimento colectivo que suporía ata 534 despedimentos na planta de aluminio do complexo industrial de San Cibrao. Tamén se celebrará unha asemblea.
“Non aceptamos a proposta de Alcoa España, xa que é oposta e contraria á mesa multilateral creada en xaneiro”, aseguran os sindicatos, que manteñen que a “solución” para a fábrica de aluminio “é a intervención inmediata para dar viabilidade a un sector indispensable para a transición ecolóxica e enerxética. Tamén esiximos valentía do Goberno e que lembre que foi a primeira empresa en nomearse esencial o pasado 30 de marzo”, remarcan.
O comité, segundo expón no comunicado, solicitou á multinacional “que destistira da súa intención” ou que alomenos “agardase ao 3 de xuño, día no que os sindicatos teñen unha reunión co Ministerio de Industria“.
“É FUNDAMENTAL NON PERDER CLIENTES”
“É fundamental non perder os clientes e evitar que Alcoa lles sirva desde outras plantas”, argumentan os sindicatos. “Seguimos insistindo na necesidade dun marco estable e competitivo do prezo enerxético da luz, que ten que estar ligado a investimentos produtivos por parte das empresas que se acollan a este marco regulatorio”.
“SÓ O PREZO DA ENERXÍA NOS SEPARA DE EUROPA”
Pola súa banda, a CIG asegurou a través dun comunicado que a fábrica de aluminio “é viable“, e pediu “a intervención urxente” dos Gobernos español e galego na defensa dunha industria “esencial” como a do aluminio.
A CIG sostén que “Alcoa di que o valor do London Metal Exchange (LME) -que marca a cotización do aluminio- sumado ao alto prezo da enerxía eléctrica a fan insostible”. O sindicato nacionalista “nin acepta a súa proposta nin os seus datos, pois sabemos que a planta de San Cibrao é perfectamente viable”.
“A propia Alcoa admite que somos tan eficientes como as fábricas do Norte de Europa e o noso custo salarial é moito menor, sendo o prezo do aluminio o mesmo para eles que para nós. Só hai unha resposta á pregunta de por que esas electrolises seguen tendo o futuro que se nos nega: o prezo da enerxía”.
Deste xeito, a CIG avoga por centrar as mobilizacións “en obrigar a Alcoa a non iniciar proceso ningún que signifique a perda de postos de traballo” e “esixir ao Goberno que interveña de urxencia retornando a fábrica ao ámbito público e garantindo unha enerxía estable e competitiva”.
