EFE. Ao comezo dunha semana que se presume decisiva para o futuro de Alcoa San Cibrao, o presidente do comité de empresa, José Antonio Zan, pídelle aos “políticos” que tomen conciencia real da gravidade da situación e deixen “de tirarse os trastos á cabeza, porque é o que están facendo”, dado que ese comportamento “non ofrece nada para unha solución do problema”.
Nese sentido, opina que “o Goberno central e a Xunta de Galicia teñen que moverse máis”, porque se a clase política estivese “un cuarto de comprometida do que o está a comarca da Mariña” coa procura dunha solución aos problemas que lastran o futuro de Alcoa, “outra cor pintaría”.
Desde o seu punto de vista, “os políticos estanse comportando bastante mal” e fronte a unha comarca que se presenta unida, con milleiros de persoas nas manifestacións, a última delas en Foz, apréciase “unha separación entre os alcaldes dos municipios” afectados, que deberían “dar exemplo de unidade” e “acudir xuntos ás manifestacións”.
En canto ao futuro da planta, recordou que “a partir de agora todas as semanas van ser decisivas” e máis cando a empresa, se non dá a marcha atrás, presente “formalmente o Expediente de Regulación de Emprego (ERE)” anunciado na planta de aluminio, onde Alcoa pretende despedir 534 persoas, un recorte produtivo que afectaría a outros alomenos 400 traballadores de empresas auxiliares.
A partir dese intre, prognostica Zan, quedarán por diante “dous meses e pico bastante duros”.
MÉRCORES E XOVES, REUNIÓN COA EMPRESA
O presidente do comité recordou que o prazo de tres semanas do período de consultas informal convocado pola empresa cúmprese este xoves, de modo que podería presentar o ERE, para o despedimento colectivo dun máximo de 534 traballadores, “a finais desta semana ou principios da próxima“.
O comité manterá “o mércores e o xoves” reunións coa dirección de Alcoa, dous encontros nos que espera que a empresa “recapacite” e dea marcha atrás nas súas intencións.
SEN DATA PARA UNHA NOVA XUNTANZA COAS ADMINISTRACIÓNS
Por agora non se concretaron datas para a reunión da mesa multilateral polo futuro da planta, coa presenza de Alcoa, sindicatos, Xunta e Goberno central, nin tampouco para a reunión tripartita solicitada polos traballadores ás dúas Administracións.
Con respecto á solución inmediata á actual situación, o comité segue pensando que “o ideal sería unha intervención” pública, porque a fábrica “ten carga de traballo e clientes”, co que “non se perdería diñeiro” e gañaríanse “dous anos” para buscar unha solución “ao tema da enerxía“.
FEIJÓO ATRIBÚE O CONFLITO LABORAL Á “ÍDEOLOXÍA” DO GOBERNO CENTRAL
O presidente da Xunta, Alberto Núñez Feijóo, asegurou que non ten “ningún interese” en confrontar co Goberno de España sobre a situación de Alcoa. “Quédannos semanas“, advertiu, insistindo en que “o principal problema” para a planta de aluminio “é a falta un prezo viable da electricidade e un marco enerxético estable, posto que se trata dunha consumidora intensiva”.
Feijóo calcou o discurso mantido polo secretario xeral do PP, Miguel Tellado, durante a protesta de Foz, e incidiu en que tanto o socialista José Luís Rodríguez Zapatero como “sobre todo” o popular Mariano Rajoy, “quen herdou 30.000 millóns de débeda polo déficit tarifario”, foron capaces de achar vías para favorecer a continuidade de Alcoa en España.
Con todo, atribuíu ao actual Executivo que dirixe Pedro Sánchez “unha formulación ideolóxica” que lle impide” ter con Alcoa “a sensibilidade” que, baixo o seu punto de vista, ten “con outros sectores” e que lle levan a adoptar “outras decisións industriais”. Unha cuestión que, confesou, preocúpalle “moitísimo”, porque “Alcoa é a Lugo o que Citröen é a Vigo e Inditex a Galicia”.
Nun contexto no que outros gobernos como o francés ou o alemán apostan por inxectar liquidez e ata préstamos participativos ás empresas, Feijóo insistiu en que “sería un gravísimo erro acabar con esta industria por unha formulación ideolóxica”.
DESCULPA A ALCOA POR NON INVESTIR: “O EXECUTIVO CENTRAL NON LLO PUXO DOADO”
Feijóo admitiu que a factoría “non investiu nin se modernizou o suficiente nos anos anteriores“, pero argumentou que o Goberno central “non llo puxo doado, e menos nos dous últimos anos”, xa que “nunca se contou cun marco enerxético “estable” que permitise á compañía articular un plan estratéxico a futuro. Feijóo amosouse “a disposición” de Alcoa “para modernizar as instalacións”, e tamén, dixo, do Executivo estatal.
“Estou a disposición do Goberno central para calquera formulación que se poida facer desde a Xunta”, defendeu, aínda que ve “unha falta de respecto” que se apunte que as competencias de industria son autonómicas. “Entón podemos clausurar o Ministerio porque non se necesitaría en España”, sostivo.
Feijóo afirmou que é hora de “deixar de intoxicar e poñerse“, pero teimou en que non se trata dun problema “industrial senón enerxético” e urxiu ao Executivo “solucións”.
