Alcoa logrou reducir as súas perdas no segundo trimestre do ano ata os 197 millóns de dólares (172 millóns de euros), un 51% por baixo do resultado negativo de 402 millóns de dólares (352 millóns de euros) contabilizado no mesmo período de 2019, segundo informou a multinacional, que negocia os detalles do proceso de despedimento colectivo que podería afectar a 534 empregados da planta de aluminio da multinacional en San Cibrao, ademais de a outros 400 postos de traballo en empresas auxiliares.
“A pesar das difíciles condicións do mercado, o noso equipo reduciu os custos, aumentou a produción, mantivo envíos estables e mellorou o noso balance”, declarou Roy Harvey, presidente e conselleiro delegado de Alcoa, quen destacou que a compañía terminou o trimestre cun saldo de liquidez de case 1.000 millóns de dólares.
A cifra de negocio de Alcoa entre os meses de abril e xuño alcanzou os 2.148 millóns de dólares (1.882 millóns de euros), un 20,8% por baixo dos ingresos da multinacional no segundo trimestre do ano 2019.
Deste xeito, nos seis primeiros meses de 2020 Alcoa rexistrou perdas de 117 millóns de dólares (102 millóns de euros), o que supón reducir nun 80,5% os ‘números vermellos‘ da compañía na primeira metade do exercicio anterior.
En relación coa súa planta de San Cibrao, a compañía sinalou que o pasado 25 de xuño abriu un proceso de consultas formais de 30 días co comité de empresa que representa aos empregados na factoría, “que sufriu perdas financeiras significativas e recorrentes que se espera que continúen“, advertindo de que “un despedimento colectivo podería afectar ata a 534 empregados na planta de aluminio”, aínda que non se tomarán decisións definitivas ata completar o proceso de consultas formais.