Centos de obreiros de Alcoa San Cibrao e empresas auxiliares continuaron este domingo en Ribadeo os actos reivindicativos para reclamar unha solución para a fábrica de aluminio, na que a multinacional presentou un Expediente de Regulación de Emprego (ERE) que suporía máis de 900 despedimentos entre persoal propio e das contratistas. Acompañados das súas familias, os empregados desprazáronse á Praia das Catedrais, onde coparon os accesos para despois baixar ao areal.
Vestidos de faena, facendo soar os seus cascos contra os chanzos da escaleira, portando pancartas, os traballadores da planta mesturáronse cos turistas nun día do ano, en pleno mes de xullo, no que o acceso ao monumento natural só está permitido mediante cita previa, con aforamento restrinxido. As familias, coas camisolas habituais nos actos de protesta, co lema ‘A Mariña sálvase loitando‘, participaron dunha reunión na que deixaron escrita na area dúas mensaxes claras: “as cubas non se paran” e ‘enerxía solución‘.
O acto anticipa unha semana chave para o futuro da fábrica. O luns -19.00 horas, de xeito telemático- reunirase a mesa multilateral polo futuro da planta, coa presenza de Goberno central, Xunta de Galicia, Alcoa e sindicatos, mentres que o martes, día 28, retomaranse as conversas do ERE.
