O presidente do comité de empresa de
Alcoa San Cibrao,
José Antonio Zan, confirmou, en base á información facilitada pola Subdelegación do Goberno en Lugo e o Ministerio de Industria, que a multinacional mantivo “varios
contactos”
cunha empresa interesada en comprar a fábrica de aluminio. Trataríase do grupo británico
Liberty House, segundo concretaron os sindicatos. En principio, a compañía estadounidense mantense na súa posición de non vender a instalación coas
cubas de electrólise operativas. Ademais, rexeita por agora falar da refinería de
alúmina.
EMPRESA RADICADA NO REINO UNIDO
Fundada no 1992, Liberty House é unha empresa do sector metalúrxico radicada en Londres (Reino Unido). Conta con centros globais en Dubai, Singapur, Hong Kong, Sidney e Nova York, e o seu negocio baséase no comercio de metais férreos e non férreos, reciclaxe dos mesmos, produción de aceiro e aluminio e produtos e servizos de enxeñería. A súa facturación anual (cifras de 2018) ronda os 7,9 billóns de dólares e emprega preto de 30.000 persoas en todo o mundo.
POSÚE A ÚNICA FUNDICIÓN DE ALUMINIO DA GRAN BRETAÑA
A división Aluminio de Liberty posúe e opera a única fundición do metal que queda no Reino Unido: Liberty British Aluminum.
Con sede en Fort William, nas montañas escocesas, as instalacións de fundición están alimentadas por dúas estacións hidroeléctricas veciñas e un complexo de unidades bio-diésel in situ.
SINDICATOS E ALCOA RETOMAN AS CONVERSAS DO ERE
Zan confirmouno nun xoves no que se celebra unha nova reunión coa dirección de Alcoa, nun restaurante de
Lugo, dentro do proceso de consultas do
Expediente de Regulación de Emprego (ERE) que podería deixar na rúa a 534 traballadores da planta de
aluminio ademais de suprimir outros 400 contratos nas
empresas auxiliares.
“Alcoa o que di é que non hai nada concreto, pero mentiunos claramente, porque igual non concretaron ningún prezo nin chegaron a acordos definitivos, pero si abriron contactos coa empresa” interesada na adquisición da factoría, lamentou Zan á entrada da xuntanza, segundo informa Efe.
CINCO DÍAS PARA QUE REMATE O PRAZO
“Supoño que nolo terá que dicir a empresa. Que quere facer coa fábrica se eses contactos son verdade. Non creo que o Ministerio nos estea mentindo
a cinco días de acabar o período de consultas, pero queremos ver papeis. Que hai de verdade en todo isto e que non hai”, dixo o sindicalista.
OS SINDICATOS PIDEN A NACIONALIZACIÓN PARA GAÑAR TEMPO
O presidente do comité dixo que os “ánimos están igual que estaban”, coa “tensión lóxica” dunha situación deste tipo, e á espera de que chegue “unha solución”. “Se non hai esa solución, porque o Goberno sexa incapaz de facer que esa empresa lle dea viabilidade” á fábrica “cun plan industrial claro e un prezo enerxético estable”, que “a nacionalice” ata que “ambas as cousas se poidan poñer encima da mesa”, pediu.
CONTRAINFORME
Zan sinalou que “sempre que se abriu un proceso deste tipo”, tanto o “
comité europeo como os comités locais” tiveron coñecemento dos “posibles plans industriais”, pero agora “o máis importante é que
paralicen o ERE para abrir ese proceso de venda, que podería levar unhas semanas”. En todo caso, tamén aclarou que a representación sindical a nivel europeo presentou un
informe no que se pon de manifesto que sería “
máis rendible vender a fábrica mesmo corenta semanas despois, que parar as cubas para poñerse a vendela”.
