Ramón González Rey/axencias. O comité de Alcoa San Cibrao presentou este venres a solicitude, no Tribunal Superior de Xustiza de Galicia (TSXG), da cautelar coa que os sindicatos pretenden paralizar o Expediente de Regulación de Emprego (ERE) presentado pola multinacional na planta de aluminio.
Así o anunciou o comité nun comunicado de prensa que conta cos tres logos dos sindicatos con delegados no organismo de representación dos traballadores: CC OO, CIG e UGT.
A cautelar, en concreto, pide a intervención ou administración xudicial da planta de aluminio por parte da SEPI (Sociedade Estatal de Participacións Industriais) e que “subsidiariamente que se ordene a Alcoa non comezar coa paralización das cubas de electrólise e en consecuencia non executar os despedimentos individuais en tanto non exista sentenza firme”.
As centrais sindicais aspiran con esta medida a que o xuíz decrete a suspensión do despedimento colectivo, que suporía a parada das cubas -nun proceso que Alcoa prevé completar como moi tarde o 31 de marzo de 2021- e a perda de máis de 900 postos de traballo -entre os 524 afectados na factoría e os máis de 400 nas empresas auxiliares-.
O ERE ao que se opoñen os traballadores, en folga indefinida desde fai días, chega logo dun proceso de negociación errado para a venda da fábrica da Mariña a Liberty House. Nun último momento foi o Goberno, a través da SEPI, o que intentou adquirila, pero a empresa tamén rexeitou a oferta, entre acusacións de ambas Administracións (a central e a galega) de actuar “con mala fe” e para evitar ter un competidor no mercado do aluminio.
Os traballadores convocaron unha manifestación en Lugo, o 24 de outubro, para reclamar a Xunta de Galicia e Goberno central a intervención pública da planta.
