O Goberno central está á espera do que decidan os tribunais sobre o expediente de regulación de emprego (ERE) de Alcoa para despois, “chegado o caso”, poder “argumentar a intervención” da planta de Cervo. Iso é o que asegura o presidente do comité de empresa, José Antonio Zan, que trasladou o presidente da Xunta de Galicia, Alberto Núñez Feijóo, e o vicepresidente económico, Francisco Conde, aos representantes dos traballadores mantida este venres.
Tras reunirse este venres na Mariña, onde se desprazaron ambos os mandatarios, Zan afirmou que, “segundo a Xunta, estase nuns tempos procesuais aos cales teñen que someterse tanto eles como o Goberno central para argumentar a intervención”. Neste sentido, será “chave” a vista xudicial polas medidas cautelares solicitadas para deter o despedimento colectivo, que suporía máis de 900 despedimentos entre a factoría e a industria auxiliar.
Zan lembrou que segue pendente a reunión da mesa multilateral e asegurou que os sindicatos estarán “pendentes deses tempos”, e admitiu que as Administracións “queren ter aberta a vía dunha venda. A nós dános igual cal dos dous trámites sexa, vender ou a intervención, o que temos claro é que non queremos que paren as cubas nin se despida a ninguén”, subliñou, para insistir en que fágase o que se faga “debe ser canto antes, porque xa van cinco meses de calvario e non se pode continuar deixando en mans da Xustiza” a crise da factoría.
Le a información completa no Galicia Confidencial.
FEIJÓO INSISTE NA VENDA: “É UNHA SITUACIÓN COMPLEXA PERO TRABALLAMOS XUNTOS”
Pola súa banda, Feijóo insistiu na posibilidade dunha venda. “Estamos nunha situación complexa, pero estamos traballando xuntos nela”, afirmou. “Se Alcoa non quere operar esta factoría que desbloquee a venda a outro operador”, recalcou, resaltando tamén a necesidade de que o Goberno central cumpra cunha tarifa eléctrica que faga posible a produción de aluminio primario, mentres non se instalen enerxías renovables de autoconsumo para a propia factoría. A perda da mesma sería sería un “disparate industrial” para España sen precedentes, sostivo.
TOMÉ: “ALCOA TEN QUE RESOLVER UN PROBLEMA MEDIOAMBIENTAL SERIO”
Pola súa banda, o presidente da Deputación, José Tomé, fixo fincapé no “problema medioambiental serio que xerou” a multinacional norteamericana coa “balsa de lodos”. “O que non pode ser é que pechen e nos deixen sen xestionar (o tanque de lamas) e sen depurar todo iso e se teña que facer con fondos públicos”, avisa. Le a intervención completa no Lugo Xornal.
O BNG APOIARÁ A MANIFESTACIÓN EN LUGO
Pola súa banda, o deputado provincial do BNG, Efrén Castro, confirmou o apoio da formación frontista á manifestación que se celebrará mañá sábado en Lugo, desde as 11.00 horas. A marcha partirá da sé da Xunta de Galicia á da subdelegación do Goberno central, onde se entregará unha solicitude formal de intervención.
“O goberno da Deputación dará o seu apoio aos traballadores que reclaman a esixir aos Gobernos da Xunta e do Estado que cumpran os seus acordos de nacionalizar a fábrica, a única vía para salvar os traballos na comarca da Mariña”, indicou, para lembrar que o Pleno provincial aprobou un acordo para reclamar esta medida.
