Os traballadores de Alcoa na Coruña manteñen a súas protestas á espera da reunión que o Goberno central manterá, na tarde deste martes, con representantes dos sindicatos, da Xunta de Galicia, do Principado de Asturias e da propia multinacional do aluminio.
Tras anunciar a empresa o peche das fábricas da Coruña e Avilés, que afectaría a 369 e 317 obreiros respectivamente, os operarios emprenderon un programa de mobilizacións que continúa na factoría coruñesa.
Os traballadores están a manter a produción “coas mesmas garantías”, segundo expón o presidente do comité de empresa, Juan Carlos López Corbacho, pero non deixan saír camións con mercancía do complexo industrial.
O sindicalista sinala que hai un “retén” de traballadores nos accesos da fábrica, ao que se suman as concentracións que de luns a xoves, pola tarde, manterán ante a instalación, con “queima de pneumáticos” para visibilizar a súa situación.
Pola súa banda, os obreiros de Avilés concentráronse de novo na tarde deste luns diante da fábrica de San Balandrán.
PIDEN UN “MARCO ENERXÉTICO ESTABLE”
Os traballadores -tamén os de San Cibrao, aínda que a planta cervense estea á marxe dos procesos de despedimento colectivo-, están expectantes ao primeiro contacto previsto para este martes, na sede do Ministerio de Industria.
O presidente do comité de empresa na Coruña reclamou de novo ás administracións, de cara á reunión, unha “solución” que ofreza “seguridade para que sigamos traballando”.
O establecemento dun marco enerxético estable é a reivindicación dos traballadores, como única garantía de que as factorías ameazadas podan seguir a ser competitivas.
A EMPRESA VARIOU O SEU DISCURSO
Alcoa, pola súa banda, mantén que o prezo da tarifa eléctrica -que supón o 40% dos gastos de produción– non é a causa do peche das fábricas, senón a perda da competitividade debido a unha “tecnoloxía menos eficiente”.
A multinacional variou o seu discurso doutras ocasións, nas que condicionou o mantemento dos postos de traballo a acadar unha rebaixa dos seus custos enerxéticos.
