O presidente do comité de empresa da planta de Alcoa en San Cibrao, en Cervo, José Antonio Zan, manifestou a súa confianza en que o Tribunal Superior de Xustiza de Galicia (TSXG) tombe o expediente de regulación de emprego (ERE) presentado pola multinacional: “Por sorte temos argumentos dabondo para que se declare nulo”.

En concreto, será este xoves, 3 de decembro, cando o alto tribunal galego decidirá se acepta os argumentos da empresa para resolver favorablemente este despedimento colectivo, que afecta a máis de 500 traballadores da factoría de aluminio -e podería ter unha incidencia noutros 400 empregos da industria auxiliar- ou se, pola contra, dita a invalidación do mesmo.

“Esperamos que se declare a nulidade e esperamos que isto abra unha nova vía e que Alcoa desista das súas intencións de despedir a 1.000 persoas e devolver unha comarca a 1970, e sente negociar co Goberno e a Xunta a saída a esta problemática”, expresou Zan.

O presidente do comité de empresa deduce que o fallo do TSXG “vai ser non só determinante para o futuro de Alcoa, senón para o futuro de toda a Mariña lucense“.

“Estamos en mans duns xuíces que van ter que decidir sobre o futuro de toda a comarca. Por sorte temos argumentos dabondo para que se declare nulo o ERE e temos a razón porque no últimos tres anos temos o mellor prezo da enerxía“, insistiu o sindicalista de CC. OO..

A MULTINACIONAL “NON TEN PERDAS”

Neste contexto, Zan volveu puntualizar que a factoría de San Cibrao non presenta “perdas”, o cal botaría por terra as intencións da dirección da compañía norteamericana.

“Agora mesmo non ten perdas. Noutros lugares do mundo están a empezar a arrincar plantas. En Noruega puxeron a andar unha fábrica que levaba dez anos parada, co cal agora mesmo é unha escusa bastante barata e unha bobada“, reflexionou.

Finalmente, o presidente do comité de empresa de San Cibrao afirmou, sen ningún xénero de dúbida, que “as plantas de aluminio e de alúmina son máis que competitivas nun período de incerteza, e agora mesmo que o período é de bonanza aínda son máis competitivas”.

UNHA SENTENZA FAVORABLE “NON SERÁ A SOLUCIÓN”

O xuízo do vindeiro xoves será á a segunda vista oral celebrada no alto tribunal galego en relación coa situación da planta de Alcoa San Cibrao, dado que previamente celebrouse outra para avaliar as medidas cautelares solicitadas polos sindicatos.

Esa vista finalizou cunha resolución que prohibe á multinacional apagar as cubas de electrólise da fábrica de aluminio primario, unha decisión que a empresa xa recorreu.
De feito, o recurso xa foi admitido a trámite polo TSXG.

O comité de empresa non oculta a importancia que tería para o futuro da factoría de San Cibrao unha resolución favorable no xuízo polo proceso de despedimento colectivo, aínda que tamén aclara que non suporía a solución ao “problema” contra o que levan loitando desde fai meses os traballadores do complexo industrial mariñao. O persoal reclama ás Administracións, Goberno central e Xunta de Galicia, unha decisión política para a intervención pública da planta se Alcoa se nega a vendela.