A multinacional Alcoa e os sindicatos –CC OO, CIG e UGT– que impugnaron o expediente de regulación de emprego (ERE) presentado pola compañía estadounidense na planta de aluminio de San Cibrao non chegaron a un acordo no acto de conciliación deste xoves, polo que en minutos comezará na sé do Tribunal Superior de Xustiza de Galicia (TSXG) o xuízo polo despedimento colectivo.
Os traballadores agardaban que o Goberno central fixese “unha última oferta” á multinacional, á que demandaban rectificar na súa intención de despedir a 524 traballadores da fábrica de aluminio, ademais de parar as cubas de electrólise. Estas medidas terían tamén un impacto noutros 400 empregos da industria auxiliar, segundo estiman os sindicatos.
Coa falta de acordo queda “remarcada aínda máis, dentro do propio xulgado, a mala fe de Alcoa de negarse a vender a fábrica por razóns espurias e intereses particulares”, sostivo o presidente do comité de empresa de Alcoa San Cibrao, José Antonio Zan.
Trátase da segunda vista oral celebrada no alto tribunal galego en relación coa situación da planta de Alcoa San Cibrao, dado que previamente celebrouse outra para avaliar as medidas cautelares solicitadas polos sindicatos. A Sala do Social do TSXG deulle a razón á parte social impedindo á empresa parar as cubas -non así executar os despedimentos-, unha decisión que vén de ratificar trala presentación de recurso por parte da compañía.
