EFE. Preséntanse por diante semanas decisivas para o futuro de Alcoa San Cibrao, despois de que o comité de empresa e a multinacional asinasen o acordo para levantar a folga indefinida e explorar de novo a posibilidade dunha venda da planta de aluminio á Sociedade Estatal de Participacións Industriais (SEPI).
A multinacional, mediante un comunicado, informou de que no prazo “máximo de dúas semanas” enviaralle á SEPI unha “proposta de condicións” para iniciar “o proceso de negociación” para unha posible venda da planta de aluminio primario de Cervo.
Ademais, Alcoa quixo subliñar nesa nota “o seu compromiso co diálogo e a súa disposición a negociar de boa fe“, actitude que, segundo a propia multinacional, “mantivo en todo momento”.
A representación dos traballadores espera que a negociación para a venda comece esta mesma semana.
En declaracións a EFE, o presidente do comité, José Antonio Zan, dixo que asinado o acordo para alcanzar a “paz social” que esixía a multinacional, “agora todo queda en mans de Alcoa e da SEPI, que teñen que negociar para chegar a bo porto, como non pode ser doutra forma”.
Zan confía en que esta mesma semana se produzan movementos para un primeiro encontro entre os representantes da dirección de Alcoa e a propia SEPI, unha vez que o propio presidente da compañía xa se abriu “publicamente” e “ante os accionistas” da empresa “a negociar esa venda”.
O ACORDO PARA SUSPENDER A FOLGA E COMEZAR AS NEGOCIACIÓNS ACABA O 30 DE ABRIL
“Esperamos que esa negociación dea os seus froitos e permita chegar a un acordo xeral. Despois quedarían pequenos acordos e a visita á planta”, por parte do posible comprador, “para levar a cabo a venda”.
Alcoa, pola súa banda, comprometeuse a informar “sobre a evolución das negociacións unha vez ao mes” nunha “mesa informativa multilateral integrada polos representantes dos traballadores, o Ministerio de Industria e a Xunta de Galicia”.
O acordo asinado por Alcoa coa representación social estará en vigor ata o 30 de abril de 2021.