O Observatorio da Mariña pola Igualdade gañou o Premio Begoña Caamaño da Deputación da Coruña polo seu “traballo continuado pola igualdade, con impacto directo en diversos ámbitos da sociedade”, segundo informou o organismo provincial.
Estes aspectos, así como os seus proxectos feministas, foron algunhas das cuestións que valorou o xurado para outorgarlle o premio desta terceira edición, dirixido a proxectos culturais pola igualdade.
En concreto, o fallo destacou a “longa traxectoria do Observatorio da Mariña pola Igualdade, a súa interseccionalidade, a pluralidade, o impacto directo e a súa ampla tarefa en todos os ámbitos da sociedade”.
Xosé Xurxo Couto Rodríguez (presidente), Ailen Kendelman Mouzo, María Lado Lariño, Irimia Muelas Ferreiro, María Isabel Mouriz Barja e Clara Rodríguez Cordeiro (vogais) formaron parte do xurado.
Na primeira edición do premio, foi recoñecida a Libraría de Mulleres Lila de Lilith de Santiago de Compostela. Na segunda, o galardón foi ex aequo para os proxectos ‘Elas tamén pintan‘ e ‘Implicadas no desenvolvemento‘.
DÉCIMO ANIVERSARIO O PASADO ANO
O Observatorio cumpriu o pasado 2018 os seus dez anos de andaina. Podes ler nesta ligazón a entrevista a Raquel G. Hermida, a presidenta do colectivo, realizada por Vanesa Gómez Lourido.
O SÁBADO, CHARLA SOBRE A DIVERSIDADE ÉTNICO-RACIAL
A actividade do Observatorio non cesa e esta semana continúan as Xornadas sobre a diversidade etnico-racial, que se están a desenvolver en Burela.
Así, o vindeiro sábado, ás 11.00 horas na casa da cultura de Burela, a educadora e sexóloga Jeane Costa ofrecerá unha charla sobre a ‘Cousificación e hipersexualización étnico-racial’.
