Os traballadores das empresas auxiliares da alumineira de San Cibrao, propiedade da multinacional Alcoa, iniciaron esta madrugada unha folga indefinida para reclamar o mantemento dos empregos, dependentes da continuidade da fábrica de produción de aluminio primario.
O portavoz da plataforma asociativa de traballadores de empresas auxiliares do complexo industrial de Cervo, Kike Rocha, precisou que a folga iniciada ás 06.00 horas foi convocada o pasado 21 de xullo, pero quedou en suspenso ao iniciarse a negociación para a venda da fábrica ao Liberty House, do grupo GFG Alliance.
Os traballadores decidiron reactivar a folga ao estar a piques de expirar a negociación entre ambas empresas para alcanzar un acordo pero que parece non ter solución, segundo a versión de Alcoa.
“Imos loitar polos nosos postos de traballo”, dixo Rocha, quen lamentou que os empregados das empresas auxiliares non puideron expresar a súa opinión no proceso ao non ser escoitados nin por directivos “de Alcoa, do Goberno de España nin tampouco pola Xunta de Galicia“.
Para Rocha, “non hai ningunha saída posible” a un acordo se este non prevé incluír ao medio milleiro de traballadores das empresas auxiliares.
SEN AFECTACIÓN Á ELECTRÓLISE
Sobre o desenvolvemento da folga, indicou que só están traballando aqueles operarios que cumpren os servizos mínimos e asegurou que hai “piquetes informativos” na fábrica, ademais do corte da estrada de acceso a Alcoa cunha barricada de pneumáticos, unha medida de protesta que continúa desde as sete da mañá ao peche desta información.
Segundo Rocha, o seguimento do paro é “unánime” agás daqueles compañeiros que realizan “traballos imprescindibles. Dixemos sempre que a folga non ía afectar ás cubas de electrólise, polo cal eses postos máis críticos están garantidos e o resto dos obreiros están apoiándoa ao 100%”, explica.
Por unha banda, os traballadores queren amosar “o seu desamparo” no proceso, dado que non teñen vinculación contractual con Alcoa malia realizar en moitos casos o 100% das súas tarefas no complexo industrial de aluminio. A industria auxiliar reúne a arredor de 30 firmas, das que un terzo aproximadamente ten todos os seus contratos na planta na que a propietaria presentou un Expediente de Regulación de Emprego (ERE). Recalcan que nin a titular nin as Administracións -Xunta e Goberno central- quixeron darlles voz no conflito laboral.
“QUEDAN DÍAS DE PRAZO E A SITUACIÓN PODE REVERTIRSE”, AFIRMAN OS OBREIROS
Por outra, tentar facer presión para que Alcoa acceda a unha venda da planta de aluminio a Liberty House. Sobre o comunicado emitido pola propietaria, na que asegurou que pensar en pechar unha operación antes do domingo “non é realista“, Rocha entende que a mensaxe “amosa, agora explicitamente, que non hai gran vontade de venda” por parte da titular das instalacións.
“A situación pode ser revertible, porque quedan días, e aí seguiremos”, expón o voceiro da coordinadora. De non frutificar unha venda, o 28 de setembro Alcoa e sindicatos retomarán o período de consultas do ERE, pero manteñen a súa postura: “nin cubas nin empregos. Cremos que é unha cuestión que atinxe non só a este complexo industrial senón á comarca da Mariña Lucense e a nosa responsabilidade social debe ser loitar porque se siga producindo”, indica Rocha, que precisa que a intensidade e a duración da folga virá marcada “pola decisión que se tome en asemblea”.
Os traballadores de Alcoa continúan nos seus postos ao non poder apoiar a folga, dado que asinaron coa multinacional, no pacto para suspender o período de consultas do ERE durante seis semanas a fin de abordar unha venda, que durante este período e até a fin das negociacións respectarían a paz social no complexo industrial.
