Acisa Ribadeo celebrará a súa asemblea xeral ordinaria o vindeiro 31 de xaneiro. O punto máis destacado da orde do día é a proposta de incluír as grandes superficies comerciais da localidade -tanto do casco urbán como dos arredores- como socios da agrupación de comerciantes.

Os 160 asociados do colectivo empresarial votarán se integrar os grandes comercios dentro da Acisa, para o que terían que pagar, segundo explica a directiva, unhas cotas especiais.

A intención da Acisa para o vindeiro ano é “mellorar a oferta que desde a agrupación podemos levar a cabo para atraer máis clientes a Ribadeo”. Así, a directiva exporá ante os socios o proxecto para o vindeiro ano.

A asemblea celebrarase ás 20.30 horas, no salón de actos da antiga casa sindical. Na sesión darase conta da situación contable da Acisa a 1 de xaneiro do 2019.

Ademais, presentarase unha análise e valoración das actividades realizadas, e un informe da programación de actividades para este ano que vén de comezar.

CABALGATA

Outro dos asuntos que se abordará é a Cabalgata de Reis. “Tralo intento da asociación empresarial de organizar o mencionado evento trasladarase aos socios o sucedido nas pasadas festas de Nadal coa comisión organizadora e aclararase cal é a nosa posición”, aseguran desde a Acisa.

TRIXÉSIMO ANIVERSARIO

O 30 aniversario da Acisa neste 2019, e a organización de actos para celebralo, serán outros dos puntos a tratar na xuntanza. Finalmente, a compra de bolsas para a venta tamén se abordará na reunión.