Francisco Javier Fanego será por aclamación o candidato do Bloque Nacionalista Galego (BNG) á alcaldía de Foz nas vindeiras eleccións municipais.
Nado en Foz no 1974, traballador de mantemento na factoría de Alcoa en San Cibrao, é o actual responsable local da organización en Foz e, segundo o partido frontista, “participa activamente na vida social da vila, en diversos colectivos”.
Fanego substitúe así a Lorena Seivane, cabeza da listaxe electoral nacionalista no 2015 e que foi a primeira muller candidata á alcaldía. Nos anteriores comicios, o BNG quitou dous edís.
Para o candidato do BNG, é urxente “un cambio transformador” en Foz, que lle dea voz “á veciñanza e aos colectivos e parroquias. Queremos que o concello sexa para todos e traballaremos para gobernalo baixo as premisas da trasparencia, a eficacia e a honestidade”, explicou.
“ÚLTIMOS RETOQUES” DA LISTAXE
No tocante á candidatura, o BNG precisa que está a dar “os últimos retoques” á listaxe, que estará “rematada nos próximos días” e que integrará “persoas de todos os sectores sociais, laborais, culturais e deportivos. Será representativa de todo o municipio de Foz”, asegura.
CINCO CANDIDATOS ANUNCIADOS
Cinco formacións políticas anunciaron os seus candidatos á alcaldía de Foz. O PP celebrou un acto para dar a coñecer que Javier Castiñeira optará á reelección. Tamén repetirá como alcaldable, neste caso de Foz Plataforma de Futuro, Luis Alfonso Sixto.
O PSOE optou por renovarse co liderado de Fran Cajoto, que presentará a súa listaxe o vindeiro domingo. Compromiso por Galicia (CxG), pola súa banda, presentou a Damián Sánchez como cabeza de listaxe.
