O Partido Popular (PP) de Burela deu a coñecer a candidatura completa de cara ás eleccións municipais do vindeiro 26 de maio, que liderará Manuel Rouco. Tras anunciar catro novidades e cinco candidatos que repiten, as restantes incorporacións son Yovana Oroza, Javier Pardeiro, Miguel Díaz, Carlos Saa, Marina López e Aitana Rodríguez.
Oroza, natural de Burela e enxeñeira de camiños, representa segundo Rouco “un deses novos grandes talentos da nosa vila por descubrir”.
No tocante a Pardeiro, é un home coñecido pola súa faceta de xogador de adestrador profesional de fútbol sala. Foi o técnico que gañou o primeiro título a nivel estatal da historia do Pescados Rubén Burela FSF, nunha tempada (2012-2013) na que o cadro feminino acadou Liga e Copa.
Díaz forma parte, explica Rouco, “dese relevo xeracional profesionalizado, e tan necesario, no noso sector pesqueiro”, indica Rouco que asegura que se trata “dun coñecido empresario de éxito no propio sector que, en colaboración co resto de axentes implicados, fortalecerá e mellorará o mesmo coas súas aportacións”.
Saa é “un xubilado moi coñecido no pobo que foi administrativo dunha das maiores empresas de construción de Burela e disposto sempre a aportar ideas co obxectivo mellorar a súa vila de adopción”, explica o candidato do PP.
Tamén forman parte da listaxe Marina López e Aitana Rodríguez. A primeira é auxiliar de enfermería, mentres que a segunda é unha estudante a piques de rematar o grao universitario en Economía.
“REMATAR COA PARÁLISE”
Rouco concreta así unha candidatura que pretende “sacar da parálise na que se atopa inmerso o concello de Burela e metelo de cheo no século XXI”, argumenta.