Os 630 electores da mesa 1.5.U do Perdouro, na que o vindeiro 17 de novembro se repetirán a votación das pasadas eleccións municipais, poderán solicitar o voto por correo ata o día 7 dese mesmo mes inclusive. O prazo permanece aberto desde o pasado martes, cando se publicou oficialmente a convocatoria dos comicios.
A solicitude de voto por correo debe ser presencial, en calquera oficina postal. No momento de formular a solicitude, os interesados deben acreditar a súa personalidade presentando ante o empregado correspondente o Documento Nacional de Identidade (DNI), pasaporte ou carné de conducir orixinais. A obtención do certificado de inscrición no censo é requisito imprescindible para emitir o sufraxio por correspondencia.
Por agora, non se permite realizar o trámite online e unicamente se reserva a posibilidade de non tramitar a solicitude personalmente a aquelas persoas que padecen casos de enfermidade ou discapacidade, debidamente acreditados mediante certificación médica oficial. Os tutores que acudan no nome do elector deberán estar autorizadas notarialmente.
VOTANTES DE DEZ RÚAS
Os votantes da mesa 1.5.U do Perdouro pertencen ás rúas Arcadio Pardiñas, Burela do Cabo, Camiño Real, Campón, Canabal, Torrentes, Eijo Garay, Flores, Pascual Veiga e Zeppelin. O prazo para enviar o voto rematará catro días antes da cita electoral.
Un total de 38 municipios están chamados ás urnas o 17-N, 35 deles ao non presentarse candidato á alcaldía. Só tres concellos –Granja de Langostera (Valencia), Cordobilla de Lácara (Badaxoz) e Burela- están chamados a repetir eleccións impugnadas, como é o caso do concello da Mariña Lucense, despois de que o Tribunal Superior de Xustiza de Galicia (TSXG) dese a razón a Burela Sempre na súa reclamación relativa a seis votos nulos da mesa 1.5.U do Perdouro que a Xunta Electoral Zonal (XEZ) non puido contabilizar por estravío.
PARA AS ELECCIÓNS XERAIS, ATA O 31 DE OUTUBRO
No caso das persoas que queiran votar por correo nas eleccións xerais, convocadas para o 10 de novembro tras non presentar Felipe VI candidato á investidura, o prazo para solicitar o voto por correo -co mesmo procedemento- permanecerá aberto ata o día 31 de outubro, inclusive.
