A repetición electoral na mesa 1.5.U do Perdouro de Burela deixou o mesmo reparto na corporación municipal que os pasados comicios locais, celebrados no mes de maio. O BNG conserva o décimo terceiro edil, sumando un total de tres, mentres que o PSdeG-PSOE mantense en seis concelleiros, sen alcanzar a maioría absoluta; o PP fica con catro representantes.
Burela Sempre non obtivo representación malia que, ao igual que na pasada primavera, se deu un empate entre o partido fundado polo alcalde de Becerreá, Manuel Martínez, e o nacionalista galego, resolto a favor desta última formación polo seu maior número de sufraxios, tal e como establece a Lei Electoral.
O Bloque quitou 63 votos, por 66 da pasada convocatoria. Burela Sempre perdeu un só sufraxio, pasando de 31 a 30; deste xeito, os nacionalistas obtiveron no resultado global dos comicios 810 apoios, por 270 do partido independente. Así, dase un empate a 270 respaldos para delimitar o décimo terceiro edil da corporación, que se outorga á formación con máis votantes segundo estipula a normativa. Deste xeito, entrará na corporación Silvino Oroza Cordido.
PARTICIPACIÓN DO 48%
Nunha cita de escasa participación -a porcentaxe caeu do 63,96% do pasado maio ao 48%-, o PSOE acada 116 votos polos 157 obtidos o pasado 26 de maio; o PP, que acadara 107, ten 86. Ciudadanos recibiu dous sufraxios e Vox un. Houbo tres votos nulos.
PSdeG-PSOE suma así 1.837 votos; o PP 1.089; o Bloque acada 810; Burela Sempre 270; Ciudadanos 193; Vox 61.
RECLAMACIÓN POR SEIS VOTOS NULOS
A repetición electoral debeu convocarse trala anulación dos resultados na mesa decretada polo Tribunal Superior de Xustiza de Galicia (TSXG) a raíz da reclamación de Burela Sempre, en relación con seis votos nulos extraviados que non puido contabilizar a Xunta Electoral de Zona (XEZ).
