Pontón compromete un "plan Mariña" nun mítin a través das redes sociais - Xornal da Mariña

- Advertisement -

A candidata do BNG á Presidencia da Xunta de Galicia, Ana Pontón, comprometeu aprobar un plan no que se concrete a participación do Executivo galego na nacionalización de Alcoa e a “recuperación” da área Sanitaria da Mariña “no primeiro Consello” que se celebre tras as eleccións se se converte na próxima presidenta autonómica.

ALCOA

No marco dun mítin virtual celebrado o pasado xoves no que se abordou a situación da comarca, Pontón asegurou que, se accede ao Goberno galego, “no primeiro Consello” que teña lugar poñerase en marcha o Plan Mariña, que “significará concretar cal é a porcentaxe co que a Xunta vai participar na nacionalización de Alcoa” e un proxecto de “rescate” para o sector hostaleiro e turístico.

SANIDADE

Así mesmo, a candidata do Bloque á Presidencia do Executivo autonómico detallou que “a outra cara do plan é a sanitaria”, xa que, tal e como sinalou, os cidadáns da comarca denuncian desde “hai anos” os “recortes de servizos e a degradación que se produce na sanidade pública”. Por iso, a líder da formación frontista asegurou que “é momento” de apostar pola mesma e comprometeu que un goberno da Xunta no que o BNG ostente responsabilidades “recuperará” a área sanitaria da Mariña, o que se traducirá en “máis medios e máis recursos”.

“A MARIÑA RESPONDERÁ NAS URNAS”

“Faremos historia na Mariña”, vaticinou a líder nacionalista, quen afirmou que os galegos “pararán os pés” ao PPdeG. Así, insistiu en que resulta preciso “un golpe na mesa” que mostre que a comarca “existe”. “Feijóo está a deixar caer á Mariña e o próximo 12 de xullo temos que poñer á fronte ao BNG para levantala”, resolveu. Ademais, remarcou que “esta bisbarra, ao longo da súa historia, sempre tivo que loitar e traballar para conseguir avances”. Por esta razón, recalcou que o próximo 12 de xullo os seus cidadáns “deben responder nas urnas” para non permitir que “os que están a mentir e tentando tapar a situación da Mariña por intereses electorais se saian coa súa”, en alusión ao presidente da Xunta e candidato do PPdeG á reelección, Alberto Núñez Feijóo.

BROTE

Nesta liña, Pontón volveu criticar que o presidente autonómico limitase “a dous ou tres bares que había que pechar” un rebrote que dous días despois conlevou o peche de toda a comarca. “Isto pasa porque só mira os seus cálculos electorais, cando debía salvagardar a saúde das persoas”, razoou á vez que chamou a “deixar atrás a un goberno que non está á altura” da situación.

“O PP MINTE IGUAL QUE COAS VACAS TOLAS OU O ‘PRESTIGE'”

Deste xeito, a portavoz nacional do BNG concluíu que “o PP mostrou que cando hai crise bota balóns fose e minte igual que nos mentiu nas crises das vacas tolas e o ‘Prestige‘”. Así as cousas, insistiu en que “o primeiro ten que ser a saúde das persoas” e augurou que a comarca sairá “fortalecida” desta situación, tras a que “vai volver a demostrar que é un pobo forte que sae adiante e plántalle cara á adversidade”.

“TENTOUSE CRIMINALIZAR Á XENTE NOVA”

Adicionalmente, Pontón eloxiou a “responsabilidade” da cidadanía da comarca en relación ao cumprimento das medidas de seguridade decretadas para evitar a propagación do virus, mentres criticou o “intento de criminalizar á xente nova” da Xunta. Así, reprobou que non dispoña dun plan de resposta para rebrotes de contaxios a pesar de que contou con “catro meses” para elaboralo e que, ademais, “caia na improvisación e a mentira”.

ERMIDA: “MAQUÍLLANSE DATOS”

Durante o mítin virtual, a alcaldesa de Barreiros, Ana Ermida, puxo en valor a “difícil decisión” adoptada hai unha semana polo Bloque ao suspender os actos electorais programados na Mariña e subliñou que a cidadanía precisa da “valentía” dos dirixentes para adoptar este tipo de resolucións. En cambio, a rexedora de Barreiros lamentou que o Goberno galego continúe “maquillando datos” sobre os contaxios localizados na comarca e Feijóo “se atreva a poñer á mesma altura as decisións de se ir votar ou a tomar un café“. Ademais, denunciou que o presidente galego pretendese “converter en autoridades sanitarias aos Concellos” e “descargar a responsabilidade (de acudir ás urnas) nas persoas contaxiadas ou en seguimento”.

“MALA XESTIÓN” DO PP

Pola súa banda, o ‘número 2’ da candidatura do Bloque por Lugo, Daniel Castro, chamou a votar ao BNG para “acabar co paternalismo” e a “mala xestión” do PPdeG á fronte da Xunta. A cabeza de lista do BNG pola provincia de Lugo, Olalla Rodil, instou a converter a xornada electoral nun “acto de dignidade colectiva” e un “clamor masivo”. O encontro virtual contou tamén coa participación do deputado do BNG no Congreso, Néstor Rego, quen criticou que, a pesar de que hai meses que a súa formación defende a nacionalización de Alcoa, o PPdeG non recoñecese que é unha opción ata este momento. Ademais, ironizou con que as forzas de esquerdas expoñan esta medida e “non teñan responsables (da súa formación)” nos ministerios de Industria e Traballo para promovela.