O Goberno central inaugurará cun acto ás seis da tarde deste venres o alumeado da Ponte dos Santos, que cruza a ría de Ribadeo e une Galicia e Asturias.
O Executivo satisfará así unha petición do goberno ribadense e tamén do de Castropol. Cadanseu pleno aprobou solicitar ao Ministerio de Fomento que dotase de luz ao vidauto.
Despois de anos sen ver atendida esta solicitude, o alcalde de Ribadeo, o nacionalista Fernando Suárez Barcia, tentouno de novo co cambio de Goberno en Madrid e desta volta o Executivo do partido socialista accedeu.
Suárez Barcia sinala que “remata a noite da infamia á que foron sometidos Castropol e Ribadeo durante anos pola súa cabezonería”.
O rexedor ribadense lamentou a actitude do anterior Executivo, do PP, asegurou que “pedimos por escrito formalmente varias veces que se solucionase este problema e chegamos a dicirlle ao Goberno que de ocorrer algún accidente por falta de luz, serían responsables penais das consecuencias”.
A ESCURAS DESDE FINAIS DE 2011
A Ponte dos Santos, construída no 1987, ficaba a escuras desde finais de 2011, cando o goberno de Castropol se negou a asumir un gasto que correspondía ao Estado.
No 2008, a construción pasou a soportar o paso da autovía A-8, o que supuxo que minguara a amplitude das beiravías, o que ocasiona tamén problemas aos ciclistas, peóns e peregrinos, posto que se trata dun lugar de paso do Camiño norte, cada vez máis frecuentado.
