A riada que causou a morte dunha persoa en Xunqueira e afectou ás vivendas dunhas 40 familias enfrontou este xoves a Augas de Galicia e o Concello de Viveiro.
A polémica xurdiu despois de que a directora do ente autonómico, Teresa Gutiérrez, asegurara no Parlamento de Galicia que “o goberno local era coñecedor da situación de risco potencial de rebordamento”.
Gutiérrez respostou así a unha pregunta do deputado de En Marea Marcos Cal. A directora de Augas de Galicia asegurou que a zona afectada polas inundacións do pasado 18 de novembro “xa estaba catalogada como de risco potencial de inundacións, e que tanto o Rego da Cova como o Trasporta están consideradas áreas de perigo significativo”.
A dirixente do organismo dependente da Consellería de Infraestruturas e Mobilidade asegurou que se puxeron a disposición das autoridades municipais de Viveiro “os mecanismos correspondentes e necesarios” para coñecer estes riscos, sen que o goberno local, asegurou, “presentase ningunha alegación ao respecto“.
Cal, pola súa banda, afirmou que o Concello contactou coa Consellería para adoptar medidas e “foi o Goberno galego o que dixo que non había nada que facer porque estaba todo en orde“.
XIRO NO DISCURSO
As declaracións de Gutiérrez supoñen un xiro na postura de Augas de Galicia, a quenes os veciños acusaron reiteradamente de non atender as súas peticións de limpeza do río Fontecova.
Até o de agora, o Executivo autonómico aludira a un fenómeno meteorolóxico “que ocorre cada 500 anos” para xustificar que “unha limpeza non tería evitado a riada”, e afirmara que os técnicos de Augas de Galicia comprobaran “en setembro que non había ostáculos” para o cauce.
MALESTAR
As palabras de Gutiérrez sentaron mal no goberno local viveirense. A alcaldesa, a socialista María Loureiro, sinala que “o Concello foi sempre consciente da situación de risco que existía e por iso, xunto coa asociación de veciños de Xunqueira, solicitamos varias veces que se limpara a zona“.
A rexedora lembra que “hai dous anos, o Concello decidiu actuar pola súa conta dado que non tiñamos resposta e dado que percibíamos que había un perigo e fomos multados por este motivo”, unha afirmación que confirman membros da asociación veciñal.
Loureiro asegura que “hai unha zona que nos corresponde limpar a nós e outra a Augas de Galicia. Na nosa parte, pedimos rapidez na concesión dos permisos; e na parte que lles toca a eles, solicitamos que o fagan”.