O Ceip de Cervo resultou un dos 17 gañadores do quinto concurso de traballos por proxectos baixo a coordinación da biblioteca escolar, que convoca a Consellería de Educación, Universidade e Formación Profesional.
A primeira fase do certame vai dirixida a proxectos de carácter interdisciplinario ou proxectos documentais integrados nos que participe un mínimo do 40% dos grupos existentes no centro (e un 40% dos departamentos no caso dos centros de secundaria).
Nesta modalidade, a biblioteca do Ceip de Cervo foi premiado polo traballo ‘Cervo alén de Europa’.
O proxecto inclúe un noticiario publicado en Youtube, relacionado coa participación do centro educativo no programa Erasmus+, que levou a estudantes e docentes de Cervo a Grecia, antes de acoller, no pasado mes de outubro, a alumnado de varios países europeos. Podes velo aquí.
Pero ‘Cervo alén de Europa’ constou doutras moitas actividades, que podes consultar neste enlace.
PLAN LÍA
Esta convocatoria enmárcase no Plan LÍA (Lectura, Información e Aprendizaxe) de bibliotecas escolares 2016-20, que ten entre os seus obxectivos propiciar a aprendizaxe por proxectos e outras metodoloxías activas, empregando os recursos e servizos da biblioteca.
Deste xeito favorécese o traballo en equipo, así como o desenvolvemento das competencias chave e, en concreto, a mellora da competencia informacional e mediática (ALFIN/AMI).
