A necesidade de melloras no campo de fútbol Pepe Barrera enfrontou este venres á Xunta de Galicia e ao goberno local de Ribadeo.
O Executivo autonómico expuxo que este ano reserva para as obras de drenaxe e renovación integral do céspede unha partida de 46.250 euros, unha cantidade “mísera” segundo o alcalde ribadense, o nacionalista Fernando Suárez Barcia.
O delegado territorial da Xunta en Lugo, José Manuel Balseiro, mantivo unha xuntanza coas directivas do Ribadeo Fútbol Club, que se ocupa do primeiro equipo masculino -que milita en Preferente Autonómica-, e da Sociedade Deportiva Ribadeo -que se encarga da base-, para explicarlles a proposta de colaboración.
O delegado territorial asegurou que “esta achega, sumada ás que poderían incorporar outras administracións, faría posible acometer este mesmo ano as obras de mellora da drenaxe e a renovación do céspede, que son as máis necesarias”.
Balseiro asegurou que a proposta tivo “boa acollida” entre as dúas entidades, e anunciou que nos vindeiros días “porémonos en contacto co concello para articular as vías de colaboración”, dado que as instalacións son de titularidade municipal e a achega debe materializarse mediante un convenio ou acordo formal.
PROXECTO DE 400.000 EUROS
Non semella que o acordo sexa doado. No pasado mes de novembro, o Concello cifrou en 400.000 euros as obras necesarias para o Pepe Barrera. O proxecto incluía a substitución do firme por outro novo, o cambio do céspede e do alumeado, e novos sistemas de drenaxe e rego.
Daquela, Suárez Barcia comprometeu un investimento de 50.000 euros por parte do Concello e instou a Xunta e Deputación de Lugo a achegar 175.000 euros por administración.
No pasado mes de xaneiro, o Concello reservou nos orzamentos unha partida para as obras.
Tralo anuncio da Xunta, Suárez Barcia tachou de “esmola” a cantidade comprometida. “Debera darlles vergoña vender semellante miseria”, asegurou.
O CONCELLO COMPROMETEUSE A ACHEGAR 50.000 EUROS E pediu financiamento PARA UNHA REMODELACIÓN “CON SERIEDADE”
O alcalde de Ribadeo sinalou que o proxecto do Concello implica “facer un campo novo con seriedade, cunha renovación total do céspede. Hai que levantar, facer toda a drenaxe, nivelalo, porque hai un metro e medio de desnivel dunha esquina a outra”, explicou.
Tamén aludiu á “necesidade” de facer “un novo rego, con novas canalizacións, darlle saída ao saneamento, canalizar o futuro alumeado eléctrico, sementar… E todo isto custa máis de 400.000 euros, do que a Xunta achegaría o 10 por cento”, sostivo.
“FALTA DE COMPROMISO”
O rexedor afeoulle ao PP que “non deron un can para a residencia e agora non dan practicamente nada para o campo de fútbol. Non somos soberbios e non desprezaremos nada, pero xa se ve o compromiso da Xunta do PP co Ribadeo ao longo dos últimos anos”.
