A Xunta de Galicia anunciou que executará este ano a mellora da estrada LU-151 entre Fazouro e San Acisclo, no municipio de Foz, para a que destina un orzamento próximo aos 600.000 euros.

O proxecto suporá actuar en oito quilómetros, entre o final da travesía de Fazouro e San Acisclo. As obras implicarán acondicionar todo o treito mediante a execución dunha nova capa de rodaxe en mestura bituminosa en quente, da que carece actualmente a calzada, construída en rego con grava.

O delegado territorial da Xunta en Lugo, José Manuel Balseiro, afirmou que a Consellería de Infraestruturas e Mobilidade licitará e adxudicará a actuación nos vindeiros meses, coa previsión de facer as obras “neste mesmo ano”.

ESTRADA “VERTEBRADORA”

Balseiro, que presentou o proxecto xunto a técnicos da Axencia Galega de Infraestruturas (Axi) e o alcalde de Foz, o popular Javier Castiñeira, asegurou que se trata dunha estrada “vertebradora, usada tanto para desprazamentos interiores neste municipio como para as comunicacións doutros concellos coa franxa costeira e mesmo co Hospital Público da Mariña”.