Tres alumnos do Ceip de Cervo coñeceron esta semana Lituania grazas ao proxecto Erasmus KA 219 ‘Creating, Communicating, Our Diversity We Are Celebrating!‘.
Trátase do terceiro e último intercambio da iniciativa, que no pasado 30 de outubro trouxo á Mariña Lucense a alumnado de seis países europeos.
Candela Fernández, María García e Enzo Expósito (alumnos) e Rosana Otero e Esther Basanta (mestras) viaxaron ao país báltico, no que se quedaron con familias lituanas.
A expedición cervense fixo unha visita a Kaunas, onde coñeceu o museo das marionetas, o museo do diaño, a casa do chocolate, o casco vello ou unha casa tradicional lituana de mediados do século pasado. Tamén aprendeu a bailar a danza tradicional do país.
Durante a semana, os alumnos estiveron inmersos nos ensaios da obra teatral que previamente escribiron todos os países. Ao longo dos talleres de plástica crearon atrezzo para a representación teatral e a mestra de teatro dirixiunos ata lograr un produto común que foi unha representación teatral moderna, dinámica e motivadora.
VÍNCULOS ENTRE PAÍSES
O proxecto Erasmus + KA219 ten como obxectivo coñecer a través da escritura creativa a cultura de cada país, mellorar o coñecemento doutros idiomas e facer fincapé nos vínculos que unen ás distintas nacións europeas.
