EFE. O Concello de Barreiros informou de que, dacordo coas competencias que lle confire a Lei do Solo, remitiu aos propietarios e promotores dos edificios de vivendas incabadas no termo municipal as correspondentes solicitudes para que no prazo de catro meses actúen “sobre esas estruturas”, ben “para acabalas” ou “ben para que procedan á súa demolición“.

En total, precisa o goberno local, foron advertidos os titulares de once promocións de vivendas sen rematar no municipio, cinco das cales son propiedade de bancos e entidades financieiras. Son edificacións que están “en esquelete” en San Cosme de Barreiros, Moás, Remior e San Miguel e Santiago de Reinante.

“LOITA CONTRA O FEÍSMO”

O alcalde de Barreiros, o popular Alfonso Fuente Parga, absolto dun delito de prevaricación urbanística -no relativo á concesión de licenzas para construír case 3.000 vivendas durante o 2006 no municipio- por unha sentenza que a asociación ecoloxista Adega e a Fiscalía recorreron, asegura que quere “dar un paso máis na loita contra o feísmo“.

Fuente Parga insiste en atribuír este feito á “crise inmobiliaria é á situación de impás urbanístico que provocou a actuación do Goberno bipartito da Xunta de Galicia“, que pretendeu frear o bum urbanístico a través dun Decreto que tumbou o Tribunal Supremo por un defecto de forma.