As bases de licitación do proxecto de reforma do pavillón de Vista Alegre poderían estar listas en “dez ou 15 días”. O alcalde de Burela, Alfredo Llano, avanzou este prazo para concretar os termos nos que se sacará a concurso a redacción do proxecto executivo e do estudo xeotécnico das obras. O rexedor socialista tamén apuntou que o orzamento rondará os “60.000 euros”.
A urxencia do trámite ven marcada pola Liga Nacional de Futbol Sala (LNFS), que establece as condicións dos recintos nos que se disputan os encontros da Primeira División masculina na que competirá o Pescados Rubén Burela FS a vindeira tempada.
MORATORIA DA LNFS
O pavillón burelao non cumpre as esixencias pero a asociación deportiva pode conceder unha prórroga para que as instalacións se adapten ás esixencias se hai unha proposta firme para acometer as reformas.
Así, o proxecto executivo habilitaría ao club laranxa para solicitar unha moratoria que lle permitise xogar en Vista Alegre os partidos do curso 2019-2020.
Llano explicou ademais que agarda pola concreción do proxecto para “seguir avanzando” na busca de financiamento para as actuacións. “Xa tivemos conversas coa Deputación e tamén nos dirixiremos a Xunta de Galicia en canto teñamos todos os datos e cifras do proxecto”, afirmou.
OBRAS PREVISTAS
As liñas mestras da remodelación xa foron avanzadas á LFNS que, nunha carta remitida ao club, manifestou a súa conformidade coas actuacións propostas.
As modificacións previstas pasan por instalar dúas gradas móbiles que permitan ampliar aforo e habilitar o recinto para as retransmisións televisivas. Ademais, o recinto dotarase con dous novos vestiarios, servizos sanitarios e un acceso.
Segundo Llano, estas obras serían prioritarias á hora da execución e “poderían completarse durante o verán“. Nunha segunda fase, acometeríanse os traballos de mellora da segunda planta do recinto, con actuacións nos baños e no bar.
CRÍTICAS DO PARTIDO POPULAR
Con todo, a xestión da reforma segue a suscitar as críticas do Partido Popular (PP) de Burela. Os conservadores critican que o goberno local “non teña asinado ningún tipo de contrato para a elaboración das bases que rexerán a licitación do proxecto”.
Os edís populares basean a súa denuncia na resposta do alcalde á “solicitude de documentación” que realizaron o pasado sábado. Segundo explican, o Concello achegoulles dúas misivas entre a directiva do Burela FS e mais a Liga Nacional de Fútbol Sala. “Deducimos que o alcalde non se puxo en contacto coa Liga, en contra do que indica nas súas declaracións”, conclúen.
O PP engade que tampouco teñen coñecemento de “propostas de convenio coa Xunta ou coa Deputación para conseguir financiamento, nin expedientes de modificación de créditos para poder facer esta actuación”.
