Once dos catorce socorristas de Barreiros ameazaron este xoves por escrito con interpoñer unha denuncia ante Inspección de Traballo ao considerar que o cadrante que o Concello quere sacar adiante “non garante a seguridade nin a saúde dos profesionais”. O goberno municipal, pola súa banda, estuda as “consecuencias” da “desobediencia” dos traballadores ás ordes do coordinador do servizo, desde o pasado luns, e apelan “á responsabilidade” dos mesmos.

Un primeiro cadrante, a proposta do persoal, quedou invalidado trala negativa do goberno local a aprobar as horas extraordinarias pactadas outros veráns. Os vixilantes reclamaron que se cumprira un acordo que, segundo o executivo municipal, “se saía da legalidade” ao non respectar as horas de descanso mínimas fixadas pola normativa. O Concello, ademais, cifrou o gasto correspondente en máis de 10.000 euros.

Deste xeito, socorristas e Concello negociaron ao longo dos últimos días un novo reparto do persoal nas praias que os traballadores rexeitan.

UN RESCATE EN REMIOR, O DETONANTE

O motivo da desavinza é a praia de Coto, unha das máis concorridas durante o período estival e tamén das máis perigosas. No cadrante modificado trala negativa do Concello a custear as horas extraordinarias, non se ía cubrir este areal máis ca nas fins de semana.

O pasado domingo realizouse un rescate na praia de Remior, ubicada ao pé de Coto, que requeriu da participación de socorristas deste último areal. Tanto Concello como os socorristas interpretaron esta incidencia como unha advertencia. Os profesionais, da perigosidade da situación; o executivo municipal, de que é necesaria a vixilancia en Coto durante os sete días da semana, punto que incluíu na nova proposta.

Os socorristas acusan ao Concello de “modificar unilateralmente” a organización do servizo dun xeito que “pon en risco a seguridade dos traballadores e dos bañistas”.

“MÁIS DUN QUILÓMETRO” PARA ACUDIR A UNHA EMERXENCIA

Os profesionais xustifican a súa negativa en que, co novo cadrante, quedarían cinco praias colindantes a Coto –Remior, Acantilado e San Bartolo á marxe esquerda, Oliñas e Gaivota á marxe dereita- sen servizo de socorrismo. En marea baixa, salientan, estes espazos forman “un único areal” no que aos bañistas “lles resulta difícil diferenciar”, de xeito que en ocasións non saben se o espazo onde se bañan conta con vixilancia.

Isto obrigaría aos socorristas que presten servizo en Coto “a intervir tamén nestas praias” se se dá unha emerxencia, “mediando entre unha e outras máis dun quilómetro de distancia”, o que, argumentan os traballadores, “poría en risco a saúde dos vixilantes e dos bañistas”.

Os traballadores tamén denuncian que os propios socorristas que presten servizo en Coto “carecerán de apoio de profesionais en terra no caso de darse un rescate”.

CONCELLO TURÍSTICO

Deste xeito, para cubrir este areal durante os sete días da semana reclaman que se suprima o servizo na praia de Altar, outro dos principais areais dun municipio, como Barreiros, con oito quilómetros de costa e que ten unha notable afluencia de turistas e veciños con segundas residencias.

A petición de pechar Altar topou co rexeitamento do Concello, que tampouco quere prescindir de Coto pola afluencia de bañistas e pola súa perigosidade. O goberno local propón pechar Oliñas, o que por agora non serviu para chegar a un acordo.

“INDISCIPLINA”

A alcaldesa de Barreiros, a nacionalista Ana Ermida, resalta que os socorristas “levan desde o luns incumprindo as ordes” tanto do coordinador do servizo como da propia rexedora.

A primeira edil subliña que o cadrante que rexeitan os empregados “garantía que houbese dous socorristas por praia, cando no anterior aceptouse que houbese praias cun único vixilante”. Agrega que no caso de Coto, os dous profesionais contarían co apoio dunha zodiac.

RECORTE DA XUNTA, DE 19 A OITO SOCORRISTAS

Ermida lembra que o Concello dispón de 14 socorristas “cando o óptimo serían arredor de 30”, despois de que a Xunta concedese unha subvención para contratar a oito profesionais -o ano anterior financiara 19-, unha decisión que o Goberno galego xustificou en base á intención de reforzar o servizo de socorrismo nas piscinas do interior da provincia de Lugo.

Neste sentido, remarca que “non temos o persoal suficiente para cubrir todas as praias” e “partimos desa situación”. Con todo, sinala que “contamos con asesoramento de que a nosa proposta de cadrante non incumpre ningún tipo de criterio legal a nivel laboral, económico nin de seguridade”.

SEIS DE 13 PRAIAS SEN SERVIZO

Malia que apela “á responsabilidade” dos socorristas, “a mesma que asumimos nós coas decisións que tomamos”, e pese a que estuda a posibilidade de aplicar sancións por “indisciplina”, Ermida avanza que realizará “nos próximos días” unha nova proposta de cadrante.

Mentres non se chegue a un acordo, Coto -ademais das outras cinco praias de Barreiros, as anteriormente mencionadas- continúa sen servizo de socorrismo en pleno mes de xullo, con temperaturas previstas -para este xoves- de ata 23 graos.

CRUCE DE REPROCHES CO PP

O conflito desatou as críticas do Partido Popular (PP) barreirense. O ex rexedor de Barreiros e voceiro dos conservadores na corporación municipal, Alfonso Fuente Parga, critica a situación de “indefensión” dos traballadores e asegurou que lle transmitiron a posibilidade de “deixar os traballos” e de “acudir á vía xudicial”.

NIN CASETOS NIN AUGA CORRENTE

Fuente Parga lamenta unha situación “que nunca pasou neste concello” e reclama “unha xestión correcta” dun servizo “tan necesario”. O voceiro dos conservadores remarca tamén que os empregados se queixan da falta de material despois de tres semanas de traballo, pois “non teñen casetos onde refuxiarse e facer curas nin auga corrente”.

Así, insta ao executivo barreirense “a gobernar, pois ser alcalde non é só sentarse”.

“SOLUCIONÁBANSE OS PROBLEMAS CON CARTOS”

Ermida considera que o conflito polo cadrante non se daría de non estalar un previo polas horas extraordinarias e, respecto das críticas do PP, argumenta que “aquí permitíronse situacións que non eran acordes á normativa. Nós tomamos decisións e comezan os problemas. Antes solucionábanse con cartos públicos. De feito, chegaron a pagarse nóminas de 3.000 euros líquidos ao mes”, asegura.

A rexedora aféalle a Fuente Parga que o anterior goberno local “tiña que ter o traballo organizado de antes” e que, malia que “tivo coñecemento da redución da subvención da Xunta mentres era alcalde, non moveu un dedo para defender os intereses de Barreiros”.