A deputada parlamentaria do Bloque Nacionalista Galego (BNG) Olalla Rodil asegurou este sábado que as obras que está a realizar a Xunta de Galicia na estrada LU-161, que conecta Viveiro e Ferreira do Valadouro, son “totalmente insuficientes”, polo que a formación esixirá ao Goberno galego “un proxecto de ampliación e mellora” con “mais investimento”.
A representante nacionalista na Cámara galega visitou as obras de reforzo do firme desta vía, que está a acometer nestes días a Axencia Galega de Infraestruturas (AXI), acompañada da concelleira do BNG na corporación municipal de Viveiro, Míriam Bermúdez, e doutros membros da formación.
Rodil, que no 2018 levou ao parlamento galego a demanda de medidas urxentes para o acondicionamento da estrada, cre que as actuacións que se está a realizar “unha actuación básica que serve como medida provisional para minimizar a perigosidade e o risco, pero é totalmente insuficiente” nunha vía “abandonada durante máis dunha década” malia que é “unha das principais conexións entre Viveiro e A Mariña central”.
CASE 60 CURVAS EN SEIS QUILÓMETROS
Bermúdez nega a posibilidade de que a estrada sirva para este propósito “cando non conta nin con beiravías en ningunha das súas marxes, nin con gabias pavimentadas na maior parte do seu traxecto, pero si con fondas e perigosas zanxas nas cales acaban caendo con frecuencia algúns vehículos, como tamén conta cunhas 55 curvas en tan só seis quilómetros que corresponden no municipio de Viveiro”.
Rodil expón que o partido nacionalista esixirá que se desenvolva “un proxecto de trazado de ampliación e mellora da estrada LU-161 que contemple, entre outros, a ampliación da calzada para dotala de beiravías, a rectificación das curvas máis perigosas, instalación de estruturas protectoras nos pasos salvacunetas, actuacións no drenaxe da plataforma vial prevendo o seu tendido e o revestimento das gabias de seguridade”.
UNHA DÉCADA DE RECLAMACIÓNS
A mellora desta estrada, que conecta A Mariña Occidental e A Mariña Central, é unha vella demanda, de arredor dunha década. O BNG levou ao Parlamento as deficiencias da vía e os alcaldes socialistas do Valadouro, Edmundo Maseda, e Viveiro, María Loureiro, reclamaron de forma conxunta o seu arranxo. Segundo o Goberno galego, as actuacións estarán listas a finais deste mes de setembro.