O Goberno central anunciou este mércores en Viveiro que licitou esta semana as obras do novo Centro de Atención e Información da Seguridade Social (CAISS), ubicado na localidade. O proxecto conta cun orzamento de 993.441 euros e un prazo de execución de dez meses. As empresas poderán presentar ofertas ata o 14 de outubro.
A subdelegada do Goberno, Isabel Rodríguez, presentou o proxecto acompañada pola alcaldesa, a socialista María Loureiro; o director provincial da Tesourería Xeral da Seguridade Social, Juan José Rodríguez Gude, e a directora do CAISS de Viveiro. O novo edificio levantarase nunha parcela situada na avenida de Ramón Canosa, número 6, á caron do edificio de Correos e fronte ao porto.
O solar dotacional onde se levantará o novo edificio ten 1.490 metros cadrados de superficie. O proxecto inclúe a construción dun inmoble exento na parcela, totalmente acristalado e diáfano na zona administrativa, cunha pastilla opaca na parte traseira, na que se ubican os locais técnicos e de servizo. Na parte posterior haberá un aparcamento para once automóbiles, unha praza reservada para discapacitados e área para motocicletas e bicicletas.
O edificio será rectangular, de aproximadamente 33,60 por 14,40 metros e cunha única planta. A superficie construída será de 404 metros cadrados e a útil de 368,30 metros cadrados, dos que 294,30 destinaranse á area administrativa, que incluirá a zona de atención aos cidadáns e de espera, ademais do posto de autoxestión informática a disposición dos cidadáns, vestíbulo e sala de reunións. O espazo restante resérvase para aseos, arquivo, almacén e área técnica.
ANOS DE ESPERA
A licitación remata con anos de espera para trasladar e mellorar as instalacións, ubicadas na planta baixa da casa do mar de Celeiro, no mesmo edificio que ocupa o Instituto Social da Mariña (ISM).
“HUMANIZACIÓN” DA ZONA
A alcaldesa de Viveiro salientou que “é un día para estar contentos” despois de anos de “promesas incumpridas” e “cremos que con este edificio vaise mellorar a calidade e accesibilidade para a veciñanza de Viveiro. Imos humanizar esa zona e mellorala en todos os aspectos, tanto funcionais como estéticos”, concluíu.
MELLOR “ATENCIÓN” E “CONDICIÓNS” PARA O PERSOAL
Pola súa parte, Rodríguez remarcou que o Executivo en funcións “dá o paso definitivo para dotar a Viveiro dunhas modernas instalacións para este servizo público”. A subdelegada do Goberno sostivo que se atenderá “coa maior dignidade e privacidade” aos cidadáns e que o persoal do Instituto Nacional da Seguridade Social (INSS) poderá “traballar con mellores condicións”.
Rodríguez confía en que a construción do novo edificio “permitirá liberar espazos que poderán ser utilizados polo ISM e polos servizos sociais da Xunta de Galicia”.
ATENDE A “12.000 MARIÑAOS” AO ANO
Segundo precisou o Executivo central, cada ano 12.000 veciños da Mariña Lucense, en concreto da zona occidental da bisbarra, reciben atención neste centro da Seguridade Social.
