EFE. Uns 400 cabalos, pertencentes a tres manadas, percorrerán o próximo 17 de outubro as rúas do casco histórico de Mondoñedo ata a Praza da Catedral, de acordo coa tradición das San Lucas, a feira que con 863 anos de vida é a máis antiga de Galicia “e unha das que conta con maior tradición de toda Europa“. Un festival intercéltico no que actuarán o grupo irlandés Lúnasa ou Xabier Díaz, entre outros, será a gran novidade do programa.
Así o explicou o presidente da asociación que se ocupa de organizar As San Lucas, Miguel Souto, que estivo acompañado pola alcaldesa, Elena Candia; a vicepresidenta da Deputación de Lugo, Maite Ferreiro; e a voceira socialista do goberno provincial, Pilar García Porto, así como a deputada de Medio Rural Mónica Freire Rancaño.
Durante a presentación das feiras e festas das San Lucas, que este ano se celebrarán entre os días 17 e 20 de outubro, Souto recordou que estas festas teñen a súa “epicentro” no propio sector gandeiro, dado que naceron no ano 1.156, cando “Alfonso VII lle concedeu a Mondoñedo o título de cidade” e, consecuentemente, a posibilidade de organizar a súa propia feira, entón centrada na venda de gando e produtos da terra.
“Trátase de rescatar e de incentivar a orixe das San Lucas como feira, unha das de maior tradición de Europa”, engadiu, e da cal os mindonienses séntense “moi orgullosos“.
400 CABALOS BAIXARÁN DO MONTE AO CENTRO HISTÓRICO
“Esperamos que todos os galegos a sintan como súa e a gocen”, insistiu o presidente deste colectivo, quen destacou entre os actos previstos esa chegada dos cabalos de “pura raza galega“, que “durante todo o ano están pastando en liberdade“, ao centro histórico de Mondoñedo.
Recordou que “pasan pola Praza da Catedral -por diante dun templo Patrimonio da Humanidade-“, nun “momento fantástico e moi singular, porque aí é tamén onde empeza As San Lucas”, como “unha homenaxe a todos eses gandeiros que contribúen a manter o noso ecosistema agrario”.
MANUEL LOURENZO SERÁ O PREGOEIRO
Ademais dunha selección das “mellores orquestas” da comunidade, o programa deste ano tamén contempla, como “novidade importante”, a celebración dun “festival intercéltico”, o sábado 19, con representantes de Bretaña, Irlanda, Asturias e Galicia. No encontro actuarán Xabier Díaz, os bretóns Gwendal, os irlandeses Lúnasa e o gaiteiro asturiano Bras Rodrigo.
Tamén haberá un espectáculo de doma nocturna e unha mostra de maquinaria agrícola clásica. O pregón correrá a cargo nesta edición do actor e director Manuel Lourenzo, do municipio veciño do Valadouro.
AS FEIRAS E FESTAS MOSTRAN “A NOSA ESENCIA COMO POBO”
Pola súa banda, Ferreiro considerou que “dende a área de cultura, patrimonio e normalización lingüística cremos que é obriga das administración apoiar estas festas tradicionais, que mostran a nosa esencia como pobo“. A Deputación achega 20.000 euros aos festexos.
