O Goberno central citou o vindeiro 24 de outubro ao executivo municipal de Barreiros logo de que o Concello solicitase unha xuntanza para abordar o problema da depuración de augas residuais e tratar de obter colaboración do Executivo estatal para a construción dunha depuradora en San Miguel de Reinante.
A rexedora, a nacionalista Ana Ermida, e maila segunda tenente da alcalde, a socialista Carmen Veiga, desprazaranse á sé do Ministerio para a Transición Ecolóxica, onde serán recibidas polo director xeral de auga, Manuel Menéndez Prieto, ao que lle trasladarán a incidencia do mal funcionamento dos sistemas de depuración na costa de Barreiros, nomeadamente na praia de Arealonga.
Presentaranlle tamén o proxecto elaborado por Augas de Galicia para a construción dunha nova depuradora en San Miguel, que solucionaría os problemas de vertidos nas parroquias de San Miguel e Reinante e que está orzamentado en algo máis de 3,3 millóns de euros.
PROBLEMA MEDIOAMBIENTAL
A alcaldesa valora a resposta obtida do Ministerio, “pois o feito de poder amosarlles de primeira man a problemática e presentar o proxecto que lle daría solución supón un avance para lograr a implicación das distintas administracións”. Amósase tamén esperanzada en lograr a implicación do Goberno central, “xa que os efectos na zona de costas e en zonas de alto interese ambiental son notables e é preciso buscarlles unha solución no menor prazo posible”.