O Concello de Burela anunciou este xoves que as obras de reforma que está a realizar no parque de Suafonte están “a piques de rematar”, de xeito que o espazo abrirá ao público “esta semana ou a que vén“. Así o afirmou o alcalde en funcións, o socialista Alfredo Llano.
O proxecto inclúe a posta en marcha dunha fonte con seis chorros de auga programados e iluminación nocturna. Llano resaltou que nas luces “pódense utilizar diferentes cores para celebrar algún acontecemento especial, como pode ser o día do cancro ou da violencia de xénero“.
Llano, que visitou a zona acompañado do concelleiro de obras burelao, Ramiro Fernández Rey, considera que as obras “incrementan o atractivo” do parque, coa intención de que supoña “un miradoiro para o porto” que tamén permitirá ver “as pinturas do certame de murais Amarte. Ten unha vistosidade extraordinaria porque está moi ben situado, cunha zona central de que vai ser moi visitada”, afirma o rexedor en funcións.
ATRAER AOS MÁIS NOVOS
Outro dos obxectivos é atraer crianzas e a mocidade, dado que “imos ampliar a zona de esparcemento dos rapaces con novos xogos e novas atraccións, e imos procurar organizar tamén as flores, as plantas e as árbores”.