A alcaldesa de Viveiro, María Loureiro, e o presidente da Xunta de Confrarías de Viveiro, José Veiga Golpe, anuncian que pola situación derivada do coronavirus quedan cancelada a Semana Santa de Viveiro 2020 e todos os actos relacionados coa celebración.

Trátase dunha decisión “necesaria polo ben de todos, seguindo desta maneira as recomendacions das autoridades sanitarias”, expuxeron o goberno local e as confrarías a través dun comunicado de prensa.

A Semana Santa de Viveiro, de Interese Turístico Internacional, é unha das citas turísticas de referencia na Mariña Lucense. Na edición de 2019 atraeu a uns 40.000 visitantes. É a última suspensión dunha cascada de cancelacións na bisbarra pola pandemia, despois da Festa do Ourizo de San Cibrao ou do Mercado da Primavera do Valadouro.

As meirandes celebracións deste tipo a nivel estatal tamén foron canceladas, como a de Sevilla, ou en Galicia, a de Ferrol.