Catro novos positivos confirmados no Hospital Público da Mariña elevan a seis traballadoras o persoal sanitario infectado polo coronavirus no centro hospitalario de Burela, segundo puido saber o Xornal da Mariña.
Nas últimas horas deste luns confirmáronse catro novos casos nunha mesma área, a de medicina interna, o de tres enfermeiras e unha auxiliar de enfermería, que se suman ao positivo doutra auxiliar coñecido o pasado día 20. As traballadoras deberán permanecer un período de alomenos catorce días en corentena, polo que o persoal sanitario vai quedando minguado pola incidencia do coronavirus.
Unha sanitaria residente en Xove, traballadora neste caso da área de quirófanos, confirmara o seu positivo o pasado 17 de marzo. Permanece illada no seu domicilio.
Esta mediodía, o Servizo Galego de Saúde (Sergas) confirmaba un total de 63 positivos na provincia de Lugo. A esa altura, no centro hospitalario da Mariña había dúas pacientes con coronavirus ingresadas na planta de traumatoloxía e un doente que permanece na Unidade de Coidados Intensivos (UCI).
A CIG RECLAMA HABILITAR ALOXAMENTOS PARA QUE AS ENFERMEIRAS PROTEXAN ÁS FAMILIAS
A CIG-Saúde requeriu este luns ao Sergas que “busque a fórmula que permita pór a disposición das traballadoras e da poboación todos os establecementos dispoñibles diferentes ao centros hospitalarios”.
O sindicato nacionalista reclama que se habiliten “prazas de residencia en hoteis” preto dos centros de traballo, para que as profesionais poidan morar alí se así o desexan, evitando o contacto coas persoas que residen no seu domicilio, para garantir a seguridade e a protección destes.
A central tamén reclama por a disposición estes centros, con distinta ubicación, de todas as persoas que teñan que facer illamento no seu domicilio, e que para garantir a seguridade e a protección da súa familia queiran realizar o tempo do seu illamento fora do seu domicilio.
“Queremos lembrar, que para atender as necesidades destas instalacións é imprescindíbel dotalo de persoal, tamén de limpeza, cos correspondentes equipos de protección individual (EPIs) que garantan a súa protección”.
