A Consellería de Política Social documentou no reconto ofrecido na mañá deste martes un novo positivo de coronavirus na residencia Betania de Viveiro, o dun usuario. Deste xeito, segundo a estatística oficial, son tres os maiores que contraeron o virus.
Este residente, segundo concreta a dirección do xeriátrico viveirense, foi derivado á residencia Porta do Camiño de Santiago de Compostela, medicalizada para acoller a maiores con positivo que requiran tratamento leve sen colapsar hospitais e para evitar contaxios. A dirección de Betania precisa que se trata dun varón que está practicamente asintomático e que se recupera favorablemente.
Na residencia Betania documentarase tamén o positivo dunha relixiosa, que malia que segundo o cómputo de Política Social ten a alta, permanece en corentena cunha evolución favorable e pendente de que se lle faga unha nova proba.
Por agora, realizáronse probas a 114 dos 118 usuarios da residencia, 36 dos 38 empregados, ademais da totalidade das relixiosas, a meirande parte delas o pasado luns. Quedan catro maiores, dúas empregadas e unha voluntaria por someterse aos tests, que se prevén para os vindeiros días. Todos os resultados de análises anteriores, agás os catro positivos mencionados, foron negativos.
SEN POSITIVOS NA POLICÍA LOCAL
A alcaldesa, a socialista María Loureiro, precisa que o resto do persoal da Policía Local de Viveiro, nove axentes, deron negativos nas probas ás que foron sometidas despois de que dous compañeiros deran positivo.
EN BURELA ESPERAN PROBAS
En Burela, segundo o reconto da Xunta de Galicia, non variou a cifra de dous positivos documentados, ambos de traballadoras da residencia. Desde o sindicato UGT e o Concello de Burela solicitaron que se axilicen as probas a todos os empregados e maiores do xeriátrico, para evitar que se poidan producir contaxios e dar tranquilidade tanto ao persoal como aos usuarios e ás súas familias.
Unha demanda á que se sumou o BNG burelao. “Sen ánimo de alarmar e por seguridade propoñemos que se realicen test de forma inmediata a todo o persoal e usuarios do centro, que se lles dote do material necesario e equipos de protección individual axeitados para a situación e que se extreme a hixiene e desinfección como mínimo imprescindible para controlar a propagación da enfermidade”, indicou o voceiro do grupo nacionalista, Mario Pillado.
Fontes de UGT concretan que por agora tivéronse resultados da proba realizada a seis traballadoras, todos negativos, e que por agora non hai persoas con síntomas, nin entre o persoal nin entre os usuarios. Os traballadores con positivo e algunhas obreiras que pediron a baixa por precaución ao presentar algún síntoma compatible co coronavirus foron substituídas, e o centro está pendente de cubrir “unha baixa do colectivo de enfermeiras e outra dun peón”.
Desde o sindicato si reclaman que “se reforce o colectivo de camareiras limpiadoras, porque coa emerxencia sanitaria estáselles a duplicar o traballo, ao ter que desinfectar exhaustivamente e constantemente, ou polo feito de que no comedor haxa que separar mesas e comer en quendas distintas para evitar aglomeracións”.
FOZ E MONDOÑEDO, SEN NOVIDADES
En Foz, onde se lle realizaron probas a todos os usuarios e residentes, mantense estable a cifra de cinco maiores afectados -tres están tamén en Santiago- e sete traballadores con positivo. Finalmente, hai un caso activo na residencia San Rafael de Mondoñedo, tamén documentado días atrás, o dun traballador.
