IniciosociedadeNove novos positivos na residencia de Foz, tres de maiores, obrigan a...

Nove novos positivos na residencia de Foz, tres de maiores, obrigan a facer probas a obreiros e usuarios

A Xunta documenta outro caso confirmado, dun traballador, no xeriátrico de Burela

Publicada o

- Advertisement -

O Servizo Galego de Saúde (Sergas) fará finalmente a proba de coronavirus a todos os residentes -un total de 40- e traballadores da residencia de Foz, despois de que se confirmasen novos positivos no xeriátrico focego.

Así o admitiu o alcalde de Foz, o socialista Fran Cajoto, que reclamara á Consellería de Sanidade tests para todos os usuarios e empregadas do xeriátrico despois de que se confirmase un primeiro positivo días atrás, o dunha traballadora, que segundo a dirección levaba dúas semanas en corentena por síntomas de bronquiolite cando se coñeceu o resultado da proba.

Despois de que unha segunda empregada do xeriátrico se sometese á proba con resultado negativo, nas últimas horas do pasado luns coñecéronse novos casos. Segundo confirmou a Consellería de Política Social, hai tres maiores infectados e outros seis empregados, para un total de sete.

O CONCELLO RECLAMARA TESTS PARA TODOS

“Son momentos complicados, especialmente para as familias, que non poden estar cos seus por precaución. Estamos moi pendentes da evolución e púxenme en contacto coas autoridades sanitarias e de responsabilidade ante a posibilidade de que o número de contaxios sexa maior, despois de que se confirmaran novos positivos na tarde-noite de onte (polo pasado luns)”, asegura o rexedor.

Cajoto destaca que “o Concello de Foz estará en todo momento ao dispor de familiares e traballadores da residencia para todo aquilo que precisen”.

Segundo os mesmos datos ofrecidos por Política Social, hai un empregado que deu positivo por coronavirus no xeriátrico de Burela.

UNHA EMPREGADA E UN USUARIO DE MIRADOR DEL EO, AFECTADOS

Unha empregada e un usuario da vivenda comunitaria de anciáns Mirador del Eo deron positivo por coronavirus. Todos os obreiros do centro foron sometidos ás probas despois de que un residente do xeriátrico privado de Ribadeo falecese no Hospital Público da Mariña, ata o de agora a única morte documentada na bisbarra por mor da pandemia.

Segundo explicou a directora do centro, oito empregados -incluído o fisioterapeuta, que é externo- sometéronse ás probas, resultando un único negativo. A persoa infectada permanece illada no seu domicilio.

Polo de agora, realizáronse probas a outros tres dos 14 usuarios da vivenda comunitaria, non porque presentaran síntomas senón porque debían acudir a tratarse por outras doenzas en Burela, cun saldo dun positivo e dous negativos. O residente infectado, con sintomatoloxía leve, permanece illado nunha habitación, ao igual que o resto e seguindo un protocolo que o xeriátrico ribadense aplicou “desde o principio da crise sanitaria”.

BULOS

Polo de agora, ningún outro usuario nin traballador de Mirador del Eo presenta síntomas. A directora do centro lamenta que se espallen bulos que atribúen máis positivos á vivenda comunitaria, chegando incluso a comentarse “que estamos todos infectados”.

A empresa expón que custeou unha desinfección realizada o pasado sábado, mediante nebulizador e con certificado oficial, encargado á firma Sanea.

SEGUNDO POSITIVO NA POLICÍA NACIONAL DE VIVEIRO

Tamén se confirmou o segundo positivo dun axente da Policía Nacional de Viveiro, segundo admitiron fontes do corpo.

ÚLTIMAS

Dúas persoas feridas tras unha saída da vía en O Vicedo

Dúas persoas resultaron feridas, das cales unha foi trasladada ao hospital en helicóptero medicalizado, tras unha saída de...

Comesaña di que a cobertura de vacantes en Atención Primaria na Mariña resolverase en “semanas”

O conselleiro de Sanidade, Julio García Comesaña, asegurou que o proceso de cobertura de...

OPINIÓN: Sobre a mala educación e unha sentenza

Fran Cajoto, acalde de Foz Cada vez somos máis habitantes, esa é a verdade, pero...

O BNG da Mariña denuncia no Parlamento a falta de persoal en Atención Primaria

O deputado do BNG, Daniel Castro denuncio na Cámara galega a carga de traballo...