O número de casos activos de coronavirus na provincia de Lugo segue a manterse nuns parámetros de estabilidade segundo o reconto oficial ofrecido este domingo pola Consellería de Sanidade. A Xunta de Galicia contabiliza 591 casos activos, un menos có pasado sábado.
No centro hospitalario de Burela permanecen catro pacientes na Unidade de Coidados Intensivos (Uci) e outros cinco doentes en planta.
A nivel provincial, hai 13 casos na Uci -os outros nove no Hospital Universitario Lucus Augusti– e 39 en hospitalización -cinco deles no hospital mariñao, seis en Monforte, once no Virxe dos Ollos Grandes e o resto no HULA-.
Hai 539 casos documentados en domicilio, cinco máis có pasado sábado.
360 MORTES EN GALICIA
A Dirección Xeral de Saúde Pública da Consellería de Sanidade informou de que, na última actualización, o número de casos de coronavirus en Galicia ascende a 5.833, deles 1.228 son da área da Coruña, 591 da de Lugo, 1.154 da de Ourense, 482 da de Pontevedra, 1.078 da área de Vigo, 973 da de Santiago e 327 da de Ferrol.
Do total de pacientes positivos, 140 permanecen en UCI, 742 están en unidades de hospitalización e 4.951 no domicilio. Polo de agora, en Galicia rexistráronse 1.143 altas de pacientes e 360 falecementos. O número de PCR realizadas é de 43.992.
UN MAIOR FOI TRASLADADO Á RESIDENCIA DE SANTIAGO
Segundo os datos da Consellería da Sanidade, que confirmou a madre superiora da residencia, en Betania documentouse un novo positivo trala realización das probas a todos os usuarios e empregados. Trátase dunha persoa que se atopa en bo estado e que foi trasladada á residencia medicalizada Porta do Camiño de Santiago, seguindo o protocolo da Xunta. Así as cousas, dous residentes do xeriátrico viveirense permanecen en Compostela e outro no hospital de Burela. Unha relixiosa fica en illamento á espera dunha segunda proba.
En Foz, o resultado de tests a todos os usuarios e traballadores, resolto días atrás, deixou cinco maiores e sete obreiros afectados, coa alta dun empregado nos últimos días. Hai outros dous residentes infectados na vivenda comunitaria privada Mirador del Eo, en Ribadeo.
Na residencia de maiores de Burela e no centro San Rafael de Mondoñedo, onde se iniciaron as análises a residentes e empregados, hai desde hai días dúas empregadas e un traballador con positivo, respectivamente.
