O BNG anunciou o pasado martes a través dun comunicado de prensa que os grupos municipais de todos os plenos da Mariña Lucense rexistrarán mocións para rexeitar a paralización do recorte das tarefas de rebrascaxe das cubas de electrolise en Alcoa San Cibrao, unha decisión da multinacional que desencadeou Expedientes de Regulamento Temporal de Emprego (Ertes) en Reymogasa e Cyrgasa, cun total de 43 traballadores afectados.
A plataforma que aglutina a representación sindical en Alcoa solicitara apoio ás corporacións para unha moción que ten catro puntos: rexeitar a medida anunciada pola multinacional de non rebrascar as cubas; apoiar institucionalmente aos traballadores afectados; solicitar a mediación da Xunta de Galicia para “evitar que sexa efectiva a decisión da multinacional e se busque uha solución para que non paren as cubas, así coma para que ningún obreiro de empresas auxiliares perda o seu posto de traballo”; solicitar do Goberno do Estado a súa “inmediata intervención” para que a multinacional “non deixe morrer a nosa factoría”.
A formación frontista tamén levará a situación das empresas auxiliares ao pleno da Deputación.
A coordinadora do BNG da Mariña e alcaldesa de Barreiros, Ana Ermida, amosouse crítica coa postura da Xunta. “Négase a reclamar a Alcoa que manteña a reparación de cubas tal como dixo o conselleiro Conde, amosa claramente a nula preocupación desta xente pola delicada situación que se está a vivir na Mariña, donde o desemprego avanza e sen que desde a Xunta se adopte ningunha medida ou solución dedicándose únicamente a botarlle as culpas ao Goberno central”.
CRÍTICAS AO “SILENCIO” DO GOBERNO CERVENSE
Os representantes na corporación de Cervo do BNG, Diego Fernández -traballador e sindicalista en Cyrgasa- e Xorxe Caldeiro, asegurou que o recorte nas tarefas de rebrascaxe “ameaza con incrementarse e ampliar os seus efectos nas empresas auxiliares e mesmo ao cadro de persoal da propia Alcoa”, polo que reclama “solucións” que eviten “unha escalada de Ertes e perdas de postos de traballo”.
O grupo municipal nacionalista cualifica de “indecencia política” a resposta da Xunta aos traballadores “ao desentenderse do problema”, e denuncia o “clamoroso silencio” do alcalde de Cervo, o popular Alfonso Villares, que “participou activamente nunha campaña para demandar futuro para a factoría sancibrense e hoxe cala cando hai traballadores afectados con nomes e apelidos”. Deste xeito, pide a celebración dunha xunta de voceiros para abordar a situación de Alcoa nun pleno.
