O número de casos activos de coronavirus do brote da Mariña Lucense descende a 138 -dous menos ca onte- segundo o reconto oficial ofrecido este venres polo Servizo Galego de Saúde (Sergas), que contabiliza dous novos positivos e catro altas con respecto á estatística de onte.
O Sergas concreta nun comunicado de prensa que, “das 91 PCR realizadas nesta última xornada, dúas resultaron positivas. “Dende o inicio do brote e ata o día de hoxe son máis de setenta as persoas afectadas por Covid-19 dadas de alta”, indica a Consellería de Sanidade.
Dos 138 casos activos que comunica o Sergas, “a maioría son asintomáticos ou presentan síntomas de carácter leve”, e teñen a obriga de gardar corentena durante 14 días. Cinco pacientes con Covid-19 atópanse ingresadas no Hospital Público da Mariña, todas en planta, e a súa evolución “é favorable”, sinala Sanidade.
485 CONFINADOS
Do mesmo xeito, as persoas cuxas probas deron resultado negativo permanecen en seguimento no seu domicilio. Nestes momentos hai 485 persoas en seguimento domiciliario, 39 menos ca onte.
Segundo os datos ofrecidos por esta mesma fonte, na residencia de Burela tampouco se detectan novos casos -nin entre o persoal nin nos maiores- despois de que unha traballadora substituta dese positivo.
