O número de casos activos de coronavirus na provincia de Lugo ascende a 110, seis máis ca onte, segundo o reconto ofrecido polo Servizo Galego de Saúde (Sergas) este domingo.
Dos 110 positivos, cinco deles permanecen ingresados nalgún dos centros hospitalarios da área sanitaria lucense; o Sergas non concreta en cales. Hai un paciente nunha Unidade de Coidados Intensivos (Uci) e catro en planta. Os restantes 105 doentes son seguidos nos seus domicilios.
No tocante ás residencias, documéntase un único caso na comarca, o dunha traballadora do xeriátrico San Bartolomeu de Xove, que deu positivo semanas atrás. Non houbo contaxios nin entre o persoal nin entre os usuarios do centro de maiores.
No histórico da provincia producíronse 29 falecementos, seis deles na Mariña. Déronse un total de 1.251 altas, con 1.390 casos acumulados desde o inicio da pandemia.
