O número de casos activos de coronavirus na provincia de Lugo continúa en aumento. Segundo o reconto ofrecido na mañá deste martes polo Servizo Galego de Saúde (Sergas), documéntanse 352 positivos, 31 máis ca na anterior actualización. Son 33 contaxiados novos na área lucense, mentres que dous recibiron a alta.

Dos 352 casos, seis están ingresados, todos no Hospital Universitario Lucus Augusti (HULA), dous deles na Unidade de Coidados Intensivos (Uci). Un total de 344 pacientes permanecen en seguimento domiciliario.

A nivel histórico, na provincia documéntanse 32 falecementos desde o inicio da pandemia, seis deles na Mariña, ademais da morte dun varón que ingresou por Covid-19 en Burela e faleceu na Uci do Hospital da Costa malia superar a doenza no seu período na unidade de críticos. Déronse 1.301 altas, con 1.685 casos acumulados.

No tocante ás residencias, documéntase un positivo na residencia de Xove, o dunha traballadora. Esta obreira segue en illamento e non recibiu por agora a alta, como publicou por erro o Xornal da Mariña. Non houbo contaxios nin entre o persoal nin entre os usuarios do centro de maiores San Bartolomeu.

No tocante ao brote nunha unidade familiar detectado en Barreiros, onde se localizaron catro positivos, fontes do goberno local barreirense aseguran que segundo a información facilitada polo Sergas o brote “semella controlado”. Á espera de resultados de varias PCR realizadas, polo de agora non se documentaron máis casos nin no ámbito familiar, entre os contactos máis directos, nin nun cámping do municipio no que traballa unha das persoas contaxiadas.