O número de positivos activos de coronavirus na provincia de Lugo rebasa xa os 600, segundo o reconto oficial ofrecido este sábado pola Xunta de Galicia. Son 604 positivos os documentados na área lucense, 57 máis ca onte, pero 71 contaxios novos nas últimas 24 horas se se ten en conta que no mesmo período déronse 14 altas.
O número de ingresados sobe a 17 -tres máis ca onte- todos no Hospital Universitario Lucus Augusti (HULA). Tres deles permanecen na Unidade de Coidados Intensivos (Uci). Os restantes 587 pacientes son atendidos en domicilio.
O pasado venres faleceu un residente no xeriátrico do Incio aumentando a 34 as mortes no histórico da provincia. Dos 34 falecementos desde o inicio da pandemia, seis deles foron na Mariña, ademais dunha sétima vítima mortal que morreu na Uci de Burela despois de ingresar por Covid-19 e superar a doenza durante o seu período na unidade de críticos. Déronse 1.345 altas, e os casos acumulados ascenden a 1.983.
No tocante ás residencias, documéntase un único caso na Mariña, o dunha traballadora do xeriátrico San Bartolomeu de Xove. No Incio hai 86 maiores infectados e 26 empregados, dous membros do persoal contaxiados en Outeiro de Rei e outro obreiro con Covid-19 en Paradela.
DÚAS NOVAS MORTES EN GALICIA, PARA 638 FALECEMENTOS
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 3.294, 155 máis ca onte; deles 1.376 son da área da Coruña, 604 da de Lugo, 300 da de Ourense, 205 da de Pontevedra, 209 da área de Vigo, 473 da de Santiago e 127 da de Ferrol.
Do total de pacientes positivos, 15 están en Uci, 112 en unidades de hospitalización e 3.167 no domicilio. Polo de agora, en Galicia hai un total de 12.438 persoas curadas, rexistrándose 638 falecementos. Os dous últimos foron o dunha muller de 85 anos que estaba ingresada no CHUAC e o dun home de 71 anos que estaba ingresado no CHUO. Ambos tiñan patoloxías previas. O número de PCR realizadas é de 327.257.
