O número de casos activos de coronavirus na provincia de Lugo ascende a 675, 71 máis ca onte, segundo o reconto ofrecido este domingo polo Servizo Galego de Saúde (Sergas). Son en realidade 79 positivos novos nas últimas 24 horas, dado que no mesmo período déronse oito altas.
O número de ingresados na área sanitaria de Lugo, A Mariña e Monforte segue tamén en aumento. Nos datos comunicados documéntanse 21 pacientes con Covid-19 nos centros hospitalarios lucenses; 20 no Hospital Universitario Lucus Augusti (HULA) -tres deles na Unidade de Coidados Intensivos (Uci)- e un no Hospital da Costa, que permanece en planta. Un total de 654 doentes son atendidos en domicilio.
No histórico da provincia documéntanse 35 falecementos, seis deles na Mariña, ademais da morte dun varón que pereceu na Uci de Burela despois de ingresar por Covid-19 e superar a doenza no seu período na unidade de críticos. Déronse 1.353 altas e os casos acumulados superan os dous milleiros; 2.063.
143 INFECTADOS EN RESIDENCIAS LUCENSES
No tocante ás residencias, na Mariña localizouse un único caso, o dunha traballadora do xeriátrico San Bartolomeu de Xove. Non se documentaron máis positivos nin entre o persoal nin entre os usuarios. Este sábado comunicáronse outros cinco usuarios e un obreiro infectados no Incio e 18 maiores e tres empregados contaxiados en Outeiro de Rei.
Deste xeito, os contaxios nas residencias da provincia son os seguintes, 108 de usuarios e 35 de traballadores para un total de 143:
MAIORES
90 Residencia O Incio (O Incio)
18 Residencia Domusvi Lugo (Outeiro de Rei)
TRABALLADORES
1 Residencia DomusVi Monforte (Monforte)
27 Residencia O Incio (O Incio)
1 Residencia de Maiores de Paradela
5 Residencia Domusvi Lugo (Outeiro de Rei)
1 Residencia de Maiores San Bartolomeu (Xove)
DÚAS NOVAS MORTES E 140 CASOS MÁIS EN GALICIA
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 3.484, deles 1.382 son da área da Coruña, 675 da de Lugo, 324 da de Ourense, 218 da de Pontevedra, 214 da área de Vigo, 540 da de Santiago, e 131 da de Ferrol.
Do total de pacientes positivos, 17 están en Uci, 119 en unidades de hospitalización e 3.348 no domicilio. Polo de agora, en Galicia déronse un total de 12.438 altas, rexistrándose 640 falecementos. Os últimos foron o dunha residente do Incio, a quinta vítima mortal neste xeriátrico, e un o dun home de 74 anos que estaba ingresado no CHUAC. Tiña patoloxías previas. O número de PCR realizadas é de 331.803.
