O número de casos activos de coronavirus na provincia de Lugo ascende a 786, 27 máis ca onte, segundo o reconto ofrecido este mércores polo Servizo Galego de Saúde (Sergas). Se se ten en conta que nas últimas 24 horas déronse dez altas, no mesmo período localizáronse 37 positivos novos, nunha xornada negra, con catro mortes en Galicia, tres na área sanitaria lucense -dúas delas, de mulleres residentes do Incio, co que o número de vítimas mortais neste xeriátrico elévase a nove.
Dos 786 casos de Covid-19 na provincia, hai 36 persoas ingresadas. Trinta e cinco delas están no HULA, tres en coidados intensivos. Un paciente permanece no Hospital Público da Mariña, en planta. Outros 750 doentes son atendidos en domicilio.
No histórico da provincia documéntanse 41 falecementos, seis deles na Mariña, ademais dunha sétima vítima mortal que pereceu na Uci de Burela tras ingresar por Covid-19 e superar o virus no seu período na unidade de críticos. Déronse 1.376 altas, cun total acumulado de casos de 2.203 persoas.
RESIDENCIAS
No relativo ás residencias, nos xeriátricos da Mariña hai un só positivo, o dunha traballadora do centro de maiores San Bartolomeu, de Xove. Os datos globais de contaxios na provincia son os seguintes:
MAIORES
87 Residencia O Incio (O Incio)
39 Residencia DomusVi Lugo
TRABALLADORES
1 Residencia DomusVi Monforte (Monforte de Lemos)
31 Residencia O Incio (O Incio)
5 Residencia DomusVi Lugo (Outeiro de Rei)
1 Residencia de Maiores San Bartolomeu (Xove)
3.847 CASOS EN GALICIA, 105 MÁIS CA ONTE
A Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia é de 3.847, 105 máis ca onte; deles 1.387 son da área da Coruña, 786 da de Lugo, 362 da de Ourense, 250 da de Pontevedra, 269 da área de Vigo 644 da de Santiago e 149 da de Ferrol.
Do total de pacientes positivos, 14 están en Uci, 156 en unidades de hospitalización e 3.677 no domicilio. Polo de agora, en Galicia hai un total de 12.879 persoas curadas, rexistrándose 648 falecementos. As últimas persoas falecidas foron un home de 82 anos, que estaba ingresado no CHUAC; dúas mulleres de 94 e 86 anos que estaban ingresadas no HULA, e un varón de 84 anos, tamén ingresado no HULA. Todos eles presentaban patoloxías previas. O número de PCR realizadas é de 344.011.